Algemeen

Gepubliceerd op 14 maart 2013 | door Webloug

0

Lezens over ‘Grunnegs in de verzörgen’ op Dag van de Grunneger Toal

Hilda Schipper-Baptist is n Damster wichtje, dij al zo’n vatteg joar in Wirdumerdraai aan t Damsterdaip woont. Tiedens Dag van de Grunneger Toal geft Schipper-Baptist twij lezens over t belang van t Grunnegs in de verzörgen. Lezens  begunnen om 11:45 en 14:00 uur

Begun 80-er joaren ging ze op grondschoulen lesgeven. Humanistisch vörmingsonderwies en levensbeschaauwen. End 80-er joaren raaisde ze vaier joar laank, twaaimoal in week òf noar Utrecht, om doar n oplaaiden te volgen aan wat tegenswoordeg Universiteit voor Humanistiek hait. Dik twinteg joar is ze nou humanistisch roadsvraauw en geestelk verzörger. Heur vaste waarkplek is t verzörgenshoes AG Wildervanck in Veendam en Westerhave in Wildervank. In dit waark zag ze hou belangriek t veur mìnsen is, om in d’aigen toal te kinnen vertellen wat ze noa aan t haart ligt. Dat is ja woar t om gaait in t geestelk waark, levensvroagen en levensproblemen. En doar heb je voak allinneg in joen aigen toal woorden veur. Dat is ook woar heur flitslezen over gaait: “t belang van d’aigen toal in de verzörgen.”

Noast dit waark het Hilda soamen mit man Klaas n klaaine zörgploats woar mìnsen mit n verstandelke bepaarken stage lopen en dagbesteden hemmen.

Ook schrift ze aalgedureg wat verhoalen en gedichten. n Stuk of wat stoan op ‘dideldom.com’. En din is ze veur de oardeghaid ook nog wel ains aan t weven. In aimoand is ze dailnemer aan de week van het weven.

Lees HIER t haile pergram van Dag van de Grunneger Toal.

(Foto: Marij Kloosterhof)

Tags: ,



Reacties zijn gesloten

Terug naar boven ↑
  • Activiteiten