Column

Gepubliceerd op 21 april 2016 | door Webloug

1

‘Leventege toal’ column van Ingeborg Nienhuis

Leventege toal

Meert 2016, personeelskoamer veurmoalege Rieks-HBS. Der ligt n ‘Moi’ op toavel ien personeelskoamer. Deur n waarme collega doar deellegd oet betrokkenhaid bie mien klaaine stap veur menshaid, mor grote stap veur mie. n Generoatsiegenoot van mie pakt t joarliekse tiedschrift veur Dag van de Grunneger Toal op. “Wie gaat er nu het Gronings bestuderen?” Zegt er. Ploagerg kikt er mie aan. ‘Happen, groag’, oazemt zien blik. Pink Floyd plaaitte oeit, ien dat stukkenddraaide laid mit dij zuite kienderstemkes tegen “dark sarcasm in the classroom”. Wat ons aangaait is dat nait lukt: duuster sarcasme kropt joe onder hoed zo gaauw as je veur klas stoan. “Tja, wie bestudeert er nu dode talen.” Antwoord ik. Mien collega, dij docent Klassieke Toalen is, kin der wel om gnivveln.
Ien aanloop noar mien nije funksie heb ik hail voak de vroag kregen of dit nou n echte boan is, of gewoon n soort flodderg ambassadeursschop veur derbie. Ains ien zoveul tied n stukje tikken, n knus oavendje biewonen woar Grunneger toal sproken wordt en veuraal slim voak t Grönnens Laid van Geert Teis Pzn. zingen – zukswat. Din kon ik aan n verwonderde gesprekspartner oetduden goan dat t n wizze boan is en nait n loltje dat der zo n beetje bie laangs gaait. Twij joar leden waren der n perfester, n streektoalfunksjenoares en nog drij lu op t bero aan t pokkeln mit dat onderzuik noar t Grunnegers – ik mok mie der dus mor geen illusies over dat t makkelk wordt of da`k gaauw kloar bin omreden t nait zo`n dikke put is.
Elke levende toal is ien bewegen, zo ook t Grunnegers. As der nog aaltied lu binnen dij schiere dooie toalen – toalen dij sums al ien gain aiveghaid meer actief sproken worden ien doaglieks doun en loaten, mor toch nog haile nutteg wezen kinnen omdat bieveurbeeld daaiersoorten, zaalfkes en spieren ien t menselk lichoam in zo`n dooie toal optaikend binnen – leren en onderzuiken en as der lu binnen dij doar op òfstuderen en zulfs promoveren, din wait ik dat ons gelukkeg nog hail wat waark wacht mit ons leventege toal.

Tags: , ,



One Response to ‘Leventege toal’ column van Ingeborg Nienhuis

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

elf − drie =

Terug naar boven ↑
  • Literatuur activiteiten

    Geen nieuwe activiteiten