Column Fieke Gosselaar, column

Gepubliceerd op 14 maart 2017 | door Jan Glas

0

‘Laifde & verkaizingen’ column van Fieke Gosselaar

Laifde & verkaizingen

Bie overstap Almere – Amsterdam CS vang ik dail van tillefoongesprek op. ’t Komt goud, most even ofwachten. Hai is gewoon verlegen.’ t Is n blond wichtje mit bril op en gymschounen aan dij t zegd. Ik loop traain in en veur mie lopt n stoere, ietwat stevege, jong mit dreads in zien hoar en n trainingsboksem aan. Hai het n boske rode rozen in zien haand, net kocht op t station denk ik. Hoewel ik denk dat t blonde wichtje en dizze stoere jong niks mit nander te moaken hebben, gaait t bie baaide over laifde. Ik open notities in mien tillefoon en zai n notitie stoan van aander week, n bosschoppenlieske, woarop staait dat ik eerappels, boerenkool, worst en luiers neudeg haar. Veur mie zit in t woord luiers ook laifde.

Zunne schient hier, minsen zitten op terraskes bie t Waterlooplaain, terwijl t nog zacht miezerde dou ik stad achter mie luit. t Is eerste keer dat ik t Noorden oet goa sinds geboorte van Stien. Misschain zai ik teveul deur n roze bril, mor op zich denk ik dat der best wat laifde is in ons laand. Tuurlijk is der veul mis. 50 meter van ons hoes wordt in drugs handeld asof t zuite broodjes binnen. 150 meter van ons hoes woont n jonge Irakese dichter in de bed-bad-en-brood boot. Vlakbie woont vriendin dij 100 euro per moand kwiet wezen kin aan medicienen omdat ain bedrief t patent derop het. Op televizie wordt eerdbevens-ellende in vief minuten reduceerd tot zes keer t woord ‘halveerd’ deur de man dij tegen heul Nederland zee dat we ais normoal doun motten.

Wat motten we den? Ik wil gain boodschap van negativiteit en twijstried. Doar leuf ik nait in. Dat het gainaine ooit wieder holpen. Ik heb oflopen week al zoveul heurd op televizie en radio dat ik nait goud wait wat ik nog over verkaizingen zeggen kin, behalve dat we volgens mie wat meer laifde neudeg hebben. Hiervan hebben we meer in ons laand as sommige politici ons willen leuven loaten.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negentien − 8 =

Terug naar boven ↑
  • Literatuur activiteiten

    Geen nieuwe activiteiten