Column Fieke Gosselaar, column

Gepubliceerd op 8 mei 2015 | door Webloug

0

‘Kovvie op twaide verdaipen’ column van Fieke Gosselaar

Kovvie op twaide verdaipen

t Is nou n joar dat wie geweldege kovvie op twaide verdaipen hebben, bonenkovvie. Mesiene moalt ze eerst goud en den komt der echt kovvie oet. Smörns staait der n riege veur en elkenain zegt dat dizze kovvie t wachten weerd is. Toch begun ik hier en doar wat t gevuil te kriegen dat minsen van twaide verdaipen t wel n beetje as heur aigen kovvie-automoat beschaauwen.
Leste tied heur ik òf en tou n opmaarken veur de grap as: ‘Joa, wie mogen eerst, t is onze kovvie’, en den sloeten ze netjes achter in riege aan. Of: ‘Joe motten toch zulf ais zo’n automoat regeln op daarde verdaipen.’ Of: ‘ Binnen joe hier alweer? Wie kinnen der wel n poar centen veur vroagen.’ Ik laag den evenkes mit heur mit, drok snel op de knop en luuster tevreden noar t bonengemoal. Ik kin der ja ook niks aan doun.
‘Ik mot ook aine veur collega mitnemen, hur,’ zeg ik en hol nog n kopke onder mesiene en drok opnij op de knop.
‘Tou mor weer, nog aine. Mag dat wel?’ Hai glimlacht derbie.
Automoat pruttelt rusteg deur en ik begun te vermoeden dat minsen van twaide verdaipen t mit nander over had hebben. Elkenain komt bie heur kovvie-automoat om lekkerste kovvie te hoalen. Zai motten elke keer achteraan sloeten. Der staait altied wel ain persoon dij nait op twaide verdaipen waarkt bie heur automoat. Ik begriep wel n beetje dat dat wel irritant wezen kin.
‘Zo kom je mekoar nog ais tegen,’zeg ik vrolek. ‘Aans zai je mekoar nooit.’
‘Ik kom die hier elke dag tegen ja.’
‘Zo,’ zeg ik as ik kloar bin mit t apparoat. ‘Kloar alweer. Dien beurt.’
‘As t ook nog laanger duurd haar…’ Hai laagde der weer veurzichteg bie. Hai wait dat t nait mien schuld is en ook dat hai der niks aan doun kin. n Aigen bonenapparoat kopen en dij op t bureau zetten, moar ze hebben flexibele bureaus op twijde verdaipen, dus dat kin nait. Ik loop trap weer op noar boven tou en kom n collega tegen. ‘Ik wol ook net even n kopke kovvie hoalen.’

Luister HIER naar de column op Radio Noord (na ong. 10 minuten)

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

18 − vijftien =

Terug naar boven ↑
  • Literatuur activiteiten

    Geen nieuwe activiteiten