Column Henk Puister 620 column

Gepubliceerd op 13 juli 2015 | door Webloug

1

‘Körde boksem en bokkeknijen’ column van Henk Puister

Körde boksem en bokkeknijen

Muzzen valen dood van dak. Strik op terrasstoule, bainen in n keurege swaarde broek mit n mèsschaarbe volle over nkaander sloagen, wisket druppen van veurheufd mit tippie van buusdouk. Klokkie, noast hom, dragt n lichtbroene polo en n nedde duusterblaauwe spiekerbroek. Haalflaank hoar. Makkelke stappers, zunnebrille op. Kraande ligt veur hom op toavel. Net as rood stoettrommeltje. En broodje hamburger. Klokkie hapt in zien broodje. Strik drinkt verzichies van zien bronwotter mit brobbeltjes. Den pakt e zien iPad.

‘k Wol dat k aan t straand lag,’ poest klokkie. ‘Mit mien lekkere mokkel noast mie.’

‘Hou kwamst doe aan dat lekker ding,’ vragt Strik zunder echte intresse.

‘Besteld bie n lekkermokkelbero,’

‘O.’

‘Minsen worden amtammeg mit dizze uutzunderleke temperturen,’ vindt Klokkie. ‘Goan dom kwakken. Plazen. Vanmörgen hoalde k fietse tou schuurtje uut om aan t waark te goan. Zat mien jonge buurman al achter t huus. Piepmoesieklaain swaart broekie aan en verder niks. Vlèssie drinken op tegelstroatje. Wat zee dij eelskerd veur zoveulste moal? Binnen ie wel goud snik, buurman. Trek toch n körde broek aan, man. Ie binnen ja aan t moaden kweken. Zulf het dij hampel der ain dikke palternaksie van. Aal roegte en stroekerij. Voelnisputen liggen lösscheurd en verropd henter en twenter. Ongedaaierte. Tiekjederij en moezen. Katten kinnen der nait tegen kaauwen. Ain veurdail: k hol aan t ènde van moand sinten over. Katten binnen zat.’

‘Traktaaiern,’ stelt Strik veur.

‘k Loat mie nait bestellen deur zo’n snötneuze,’ antwoordt Klokkie. Hai moakt mond en haanden schoon aan servet. ‘Boas zugt mie aankomen in körde broek. Overleeft e nait.’

Strik moakt mit n beetje spije n vlekkie vot van zien waspoeierwit overhemd. ‘Wat? Hai wordt stoapelgek,’ maint e.

‘Joaren leden,’ vertelt Klokkie,’t was net zo bloudhait as vandoage, ston k te hegeknippen. Noaste buurvraauw dee achterdeure lös: Mien jong, toch. t Is zo hait. Dou toch n körde broek aan.

Ik vot. k Was der zo weer in körde spiekerboksem. Noa n zetje ging bie buren achterdeure n èndje lös. k Zag mien laive buurvraauw om hörntje loeren, zunder tekst. Deure ging weer dicht. k Heb mien buurvraauw nooit weer zain. Dijzulfde dag is ze in heur sloap op stoule overleden. k Mout derbie zeggen dat ze nait jonk meer was en zwak van gezondhaid. Laank heb k mie schuldeg vuild.’

‘Kinst t nait helpen,’ vindt Strik. ’t Komt deur dij bokkeknijen van die.’

(Wat Klokkie overkwam is stukkiesmoaker zulf eerlieks woar overkomen en hai het der joaren last van had, ofschoon hai der noar boeten tou luchteg over dee. Hai hoopt dat leesder eerst goud noadenkt veurdat hai of zai reageert.)

Tags: , ,



One Response to ‘Körde boksem en bokkeknijen’ column van Henk Puister

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

12 − negen =

Terug naar boven ↑
  • Literatuur activiteiten

    Geen nieuwe activiteiten