Muziek koenraad heidema

Gepubliceerd op 6 december 2016 | door Jan Glas

3

Koenraad Heidema oet tied kommen

Henk Scholte schreef n in memoriam

Koenraad Heidema, 1947-2016

Vanòf slootswale zai je t wolkenwit deur blaauwe luchten goan. Ook bie t ènde van t leven blift t licht bestoan

Ik kreeg vandoage n tieden dat Koen Heidema op 5 december uut tied kommen is. Ik wos dat e wat onder de leden haar, mor dizze bosschop kwam mie toch nog te gaauw. n Week of wat leden haren we nog verslag mit mekoar over t vertoalen van Middelaiwse teksten noar t Grunnegers tou. Koen haar de slinger aan Grunneger ploatsnoamen en de herkomst doarvan. Regelmoateg kwam der din op zien faceboukpagina n verhoal van aigen haand, in veur hom dege Grunnegers, veurbie. Hai was slim begoan mit ons Grunneger toal. Ik leerde hom al in de joaren zeuventeg van de veurege aiw kennen. Ik was dou net goud en wel as zanger van Törf aan loop en aaltied nijsgiereg noar wat aandere kollegoa’s in de Grunneger meziekwereld deden. Zo as dat nou ainmoal gaait kwam je al gaauw bie Koen van de Rockets terechde. Ik ree din wel ais zundoags op mien racefietse van Stad noar de Blaauwsloan in Sibboeren en gong as e der was bie Koen op verziede. Wie haren aaltied stof genogt om van gedachten te wizzeln. Veuraal onze gezoamenleke zuiktocht noar muzikoale traditsies en t schrieven van nije laidteksten kwam din aaltied staark noar veuren, noast alle twievels of t wel goud Grunnegers was. Koen was van meet of aan veur mie de man van de schaarbe observoatsies dij e hail sekuur in teksten omzette. Hai waarkte doarbie maisttieds vanuut n boasesmelodie en puulde net zo laank aan zien tekst totdat t hailemoal paasde as Pait in Grait. Hai zee doarover wel ais dat je t vergelieken mozzen mit n twijdehaands jaze dij ook nog goud paasde. t Was veur hom en mie echt de tied van t pionieren en der was bie hom dudelk n streven om de Grunneger meziek op n hoger plan te brengen. Wie kwammen mekoar in dij tied ook regelmoateg tussen de middag in de Stad in de muit en luipen regelmoateg mit mekoar al proatend de stroade op en òf en din vergat e wel es dat e nog aan t waark mos. In aal dij joaren noa dij intensieve periode haren we nog òf en tou kontakt, mor wie bleven mekoar wel mit interesse volgen. Körtsleden har k hom nog nuigd om in november noar n specioal concert van Törf te kommen in onze repetitsieschure in Peest. Hai schreef mie dou dat e der geern bie wezen wol, mor dat zien gezondhaid t nait meer touluit. Verder schreef e körtsleden mie ook noar aanlaiden van t vergeten: “Hinderk sums denk je dat dingen in vergetelhaid roaken en din vaalt dat achteròf tou. Sums denk je dat mìnsken dingen nog gewoon waiten en ast der din over hest, kieken ze die aan of ze wotter branen zain.” Dizze woorden kriegen veur mie inains n hail aander betaikenis. t Was veur mie t leste wat ik van hom vernam. Ook as alles swigt, de schiere herinnern aan Koen dij blift.

The Rockets: Hou De Win Ook Waait.

Tags:



3 Responses to Koenraad Heidema oet tied kommen

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

13 + vier =

Terug naar boven ↑
  • Muziek activiteiten

    Geen nieuwe activiteiten