Column Fieke Gosselaar, column

Gepubliceerd op 29 maart 2016 | door Webloug

0

‘Koartje sturen’ column van Fieke Gosselaar

Koartje sturen

Noast mie in auto zat dichter haile raaize op zien telefoon te kieken. Ik vruig hom hou t mit de laifde was. Dat ging goud, zee hai. Hai haar wat mit n wichtje van zien studie, nait via Tinder zee hai.
‘Och, ik mot nog n koartje noar mien nichtje sturen!’ ruip ik.
’n Koartje sturen?’ zee dichter dij, hoewel ik nait old bin, toch 10 joar jonger was den ik. ‘Dat heb ik nog nooit doan of misschain ain keer.’
‘Nog nooit?’ vroug ik verboasd. Zulf bin ik nou ook nait de mainst attente koartjesstuurder. Mit kerst stuur ik sikkom nooit koartjes of allinneg noar familie. Ik bin altied te loat. Zoas ook mit geboortekoartjes. Ik bin verschaaiden moalen vergeten aine terogge te sturen.
‘Nee, nog nooit, hou duur is zo’n postzegel aigenlieks?’
’n Euro leuf ik.’
Dichter zuchtte. ’n Euro, wat duur, ik feliciteer minsen wel op Facebouk.’
‘Op Facebouk vin ik niks,’ zee ik.
Ik heb melding dat minsen mien verjoardag op Facebouk zain kinnen oetzet. t Is veul te makkelk om minsen te feliciteren mit heur verjoardag. Elke dag krieg ik n melding: ‘Feliciteer Hans of Sander mit heur verjoardag’. Ik kin ze aigenlieks nait ains zo goud, moar as ik wil kin ik op dat moment doun asof ik ze heul attent mit heur verjoardag feliciteer, mor elkenain kin t in n seconde doun. Zulf vroag ik mie òf of zai nou extra bliede worden van mien felicitoatsie.
Zo was mien laif wonsdag joareg en dij kreeg meer den 200 felicitoatsies! Van sommigen is dat natuurlek leuk, moar mainste felicitoatsies verdwienen op de tiedsbalk en spreekst ze wieder aigenlieks ook nooit.
Ik stuur minsen dij ik echt n fijne verjoardag winsen wil laiver n iets persoonleker berichtje op de WhatsApp of SMS. As ik ze nog beter ken bel ik even of ik App dat ik ze loater nog bel.
Jonge dichter bleef ondertussen berichtjes op zien telefoon typen, hail snel schoof zien doeme over t beeldschaarm hin.
‘Feliciteert!’ schreef hai tussen al zien typeverkeer mit aandern deur.
‘Oh, ze het t ook al ‘liked’, das snel,’ zee hai en even keek hai van zien telefoon noar mie.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

vier × drie =

Terug naar boven ↑
  • Literatuur activiteiten

    Geen nieuwe activiteiten