Column Fieke Gosselaar, column

Gepubliceerd op 17 april 2015 | door Webloug

0

‘Klushoes’ column van Fieke Gosselaar

Klushoes

Doar zaten wie op leutje veranda veur deure van ainegste koamer dij opknapt was van t haile hoes. n Hoes zo groot dat ik t aantal koamers nog nait tellen kon, n stok of tien beneden en boven waren wie nait west. Dat was nait vertraauwd om rond te lopen. Wie haren n kroakende deure bie trap opendoan en n plastic stok zaail lag op traptreden om je der aan te herinnern dat noar boven lopen nait zo’n goud idee was. Wie bleven mooi zitten op leutje veranda mit onze eerste stok echt Frans stokbrood in joaren en n vlèzze rode wien.

‘Wat is t hier mooi,’ zeden wie tegen mekoar.

’t Is asof we in t televisiepergramma Ik Vertrek zitten.’

‘Joa man,’ zee laif en hai keek in t rond noar alles wat der nog te klussen viel. Dat was n haaile bult.

‘Wat kinnen wie aiglieks nog doun?’ vroug ik. Alle vougen mozzen opnij, nait alle balken waren even steveg, t dak mos opnij, loeken hingen schaif veur roamen en overal kwamen hommels oet goaten van muren vlaigen. t Probleem is dat wie baaide nait klussen kinnen, in elk geval nait de grode dingen. Aan vaarven van muren waren ze nog laank nait tou. Der was zoveul te doun dat ik nait zain kon wat der doan worden mos. Laif plukte ondertussen wat klimop-achtege begruiing van n muur. Ook begreep ik inains weer t principe van deurtrekken, dou ik mit n echte emmer vol wotter wc deurspoulde. Ik docht aan de plee achter in schure op onze boerderij in Finnewol, woar ik nooit indurfde. As ik in t donkere gat keek, kreeg ik ondertussen jeuk van t idee dat der spinnen boven mien heufd mitkeken.

‘Wie kinnen vegen!’ roupt laif

‘Wie moaken ons aigen koamer!’ zee ik.

Eerst gingen wie nog n poar doagen oetsloapen, bouken lezen, over baargweggetjes rondbroezen en wien drinken. Doarnoa veegden wie alle stof t roam oet, acht voelniszakken vol mit rötzooi. Misschain kinnen we den over n poar joar wel sloapen in ons aigen koamertje woar de muren nog van gries beton binnen.

‘Proost,’zeden wie tegen mekoar. Stiekem waren we blied dat t boven nog nait vertraauwd was om te vegen.

De column is HIER te beluustern op Radio Noord. Ongeveer noa 10 minuten.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

negen + zes =

Terug naar boven ↑
  • Literatuur activiteiten

    Geen nieuwe activiteiten