Column Jan de Jong, column

Gepubliceerd op 7 april 2015 | door Webloug

0

‘Kaizen’ column van Jan de Jong

Kaizen

‘Zuik mor ain oet.’ Deksel van t tromke gaait ter òf. Wat rokt dat lekker. Mor nou?

Zuurtjes ien aal soorten en smoaken. Zel k n toffee, n toverbaal of n fruittella pakken. Ik kiek nog ais goud. Botterbonen binnen ook lekker. Of zo’n frambooske. ‘Tou, wordt t nog wat! k Heb nait hail dag tied. ‘

Ik draai mie op rug en snoef nog ais goud. Kloarwakker. Dij lucht oet zo’n tromke slik.
Hou kom k doar ien vredesnoam bie zo midden ien naacht.

‘Jij eerst.’ Gymmestiekleroar keek mie aan. ‘Piet.’ ‘Wim.’ ‘Kees.’ Tot leste hampels overbleven. Haitied weer stoer. Woarom dat onderschaaid op wat ie nait kinnen. Omreden joen aarms en bainen bie trefbaal nait doun wat ie groag willen. Dikke stumpers. Oetlagen worden.

‘Wat wilstoe loater worden?’ Oma mit t report ien handen. Dat wus k nait. ‘Domie.’ Oma was dudelk.
Veur volk en voaderlaand votleren. Woarveur aigliek? En din. Wat mouten ie din?

En n brommer. n Solex neumen ie n ploffiets. n Zundap of n Kreidler? Of n Puch of Tomos mit hoog stuur. Eerst mor n Garelli mit vief versnellens. Votdoadelk n perbleem. Wichter pazen nait achterop. Vot ter mit, mit Garelli vanzulf. n Kreidler mos t weden.

Wichter. Nou k doar zo over prakkezaaier. Stoer.

En din? Joa hur, hou hest dat had? Hou komst doar wel nait aan! Vuilstie wel goud? Zulf waiten! Zelst nait? Ik zol as k die was. Ik wus t wel! Hest ter goud over noadocht? Waist haildaal zeker?

Hè, haitied dat gezoes.

En no vernijs n hokje rood maggeln. Ain oetzuiken oet n rieg kwakkers en clowns van poppenkaast.

Ik draai mie op zied. Ien twijduuster zai k n blode nek. n Voal t shirt kropt haalverwege n poar billen. Zel ik. n Aarm maait noar achter en trekt t dekber omhoog. Din krigt zai zoag.
Wat nou.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

4 + elf =

Terug naar boven ↑
  • Literatuur activiteiten

    Geen nieuwe activiteiten