Column Chris Kiel, column

Gepubliceerd op 28 september 2018 | door Jan Glas

0

‘Jonge sloa’ column van Chris Kiel

t Is haalf september en k heb de tomatenplanten beter opbonden. Zit zoveul aan dat ze deurzakten. As k sloa eten wil, is der aan tomaten gain gebrek dus.
Mit de sloa zulf is t minder. Planten dij k in pril poot heb, hebben slakken opvreten, t loatere plantgoud schoot deur. En wat k tegen t ende van juli zaaide, wol nait opkommen. Tot inains, leste week van augustus ston t der toch nog. 4 september warren t zulfs zukse schiere planten dat t k t nait loaten kon: k heb ze verpoot, al wos ik dat t nait wat worden kon.
Dat waiten nait allain toentjeders, dat wait elk, noadat Rutger Kopland in t gedicht Jonge sla schreef dat e n keiharde is, alles verdroagen ken:

“Maar jonge sla in september,
net geplant, slap nog,
in vochtige bedjes, nee.”

k Wait wel dat je zo’n gedicht nait letterlijk nemen mouten en dat der ainglieks t zulfde staait as in “Ik ween om bloemen in de knop gebroken,” wat Kloos zo’n 75 joar eerder schreef, mor as september n goie moand was om sloa oet te poten, den zollen dij regels van Kopland nait zo schaarp overkommen, hou overdrachtelk je ze ook lezen.
En ik vin ze wel schaarp, roaker as dij beroemde bloumknoppen van Kloos, terwiel ik over t algemain wat traditionelere poëzie toch mooier vin as moderner spul. Hou slim Kloos ook op de bres ston veur originaliteit, zien broken bloumknopkes kommen op mie n beetje ofgezoagd over, vergeleken bie dij slappe sloa in september van Kopland. (k Wait t, mien ‘ofgezoagd’ tussen bloumknoppen en sloa is ook gain beeldsproak van de bovenste plaanke, terwiel je n plaanke weer wel goud zoagen kennen.)
Gaauw weer toene in: bie t opbinden zag k hail lutje bloumknopkes in de tomaten. Ik hoop dat der nait teveul van brek (ofzoagen dou k ze zeker nait) en dat we warm haarstweer kriegen. Wel wait, wordt sloa den toch wat en krieg ik van t haarst nog verse sloa bie de tomaten oet aigen toene.

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

zeventien + 15 =

Terug naar boven ↑
  • Literatuur activiteiten

    Geen nieuwe activiteiten