Column Fieke Gosselaar, column

Gepubliceerd op 22 maart 2015 | door Webloug

0

‘Joggen 21’ column van Fieke Gosselaar

Joggen 21

Per ongeluk mit aine over sport proaten is gain goud idee. Oflopen moandag zee ik tegen n stagiair dat ik soavends haardlopen ging. Ik wos nait dat hai n fervente jogger was, zodat ik onverwachts in n sportgesprek terechtkwam. Hai vroug woar ik den joggen ging en zee dat hai elke keer n aander rondje nam, haile tied zulfde plek von hai niks aan. Hai ging sums eerst drij kilometer joggen noar Hoornseplas om doar vervolgens te begunnen mit zien haardlooprondje!
Ik zee: ‘Nee, mien vriendin en ik doun t meer zodat we in elk geval wat beweging kriegen. Wie goan nooit zo ver.’
‘Da’s ook goud,’ zee stagiair. ‘Den baauw je in elk geval wat conditie op.’
Ik docht aan onze ziedsteken dij we nog steeds noa n poar honderd meter haardlopen kriegen. ‘Valt mit heur, wie lopen mor ain keer in de week.’
Hai keek n beetje bedenkelk. ‘Ik runde lest achter Vinkhoezen, haar ik zo acht kilometer in n haalf uur te pakken. Astoe voaker gaaist, baauwt dien conditie hail snel op. Kinst overal hinlopen.’
t Klinkt hail mooi, mor ik kin miezulf en goa dat toch nait doun. Ik zee: ‘Wie joggen meer veur gezelleghaid. Wie binnen al bliede dat wie elke week goan.’
‘Da’s goud,’ zee stagiair. ‘As je nog proaten kinnen den runst op goie tempo, en kinst deurlopen blieven. Most nait boeten oadem roaken.’
‘Joa, dat is t veurdail van mit zien twijen joggen. Mainsttied goan we n haalf uur en den leggen wie ongeveer drij kilometer òf?’
Stagiair begunt te rekenen in zien heufd. ‘Dat kin nait, lopst 5 kilometer per uur, of nimst veul pauzes.’
‘Wie braaiden ons rondje wel steeds wieder oet, lopen deur t paark, langs Eemskenoal en lest binnen wie haile doar achterlangs goan. t Kin mor zo wezen dat wie inmiddels vaaier kilometer haardlopen zunder dat we t deurhebben,’ zee ik.
Stagiair knikt. ‘Joa, dat kin mor zo.’
‘Ik denk wel dat we op vaaier kilometer zitten, dat kin nait aans as we n haalf uur lopen, toch?’
‘Joa, hangt van pauzes òf,’ zee hai.
‘Zoveul pauzes nemen wie nait.’
Stagiair leek nait haildaal overtuugd.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

negen + 13 =

Terug naar boven ↑
  • Literatuur activiteiten

    Geen nieuwe activiteiten