Column Fieke Gosselaar, column

Gepubliceerd op 7 juni 2016 | door Webloug

0

‘In traaintje’ column van Fieke Gosselaar

In traaintje

In n lutje traain reden wie deur de baargen van Andalusië. ‘Nummer drij,’ zee ik tegen laif en dat was t daarde liek in mien bouk. Ik haar t al aankommen zain. ‘Hou gaait t mit Harry?’ vroug laif. Op n aandere vekaansie lazen wie n eerder dail van politiethriller over Harry Hole en doarin luip Harry op t lest rond mit ducktape om zien haals, noadat dij al verschaaidende moalen deursneden was. Hai hinkelde deur de stroaten van Oslo, omdat hai ainegste was dij moorden oplözzen kon. Hai leek al doagen in n pak onder t bloud rond te strunen zunder dat aine aan hom vroug of t wel n beetje goud ging mit hom. Op t lest leek t den toch echt te veul veur hom dou der nog n moal op hom schoten wer. Netuurlijk was t nait zo dat heufdpersonage echt staarven zol.

Zo zag ik zien bouk liggen woar op de kaft schreven stond ‘Harry Hole is terug’. Nou zat ik weer in t verhoal bie t daarde liek, mor wie waren bie t overstapstation woar wie op 5 minuten noa aansloeten mist haren. Nou mozzen wie 4 uur wachten. Op vekaansie komt dat voaker veur. Uren wachten op n traain. Mien laangste wachten was n moal 7 uur. Dat was aargens in Polen. Op zich kinnen laif en ik goud wachten op n traain. ‘Heerlijk,’ zee laif en hai keek t mini-dörpke in woar haaildaal niks was. Lege stroaten mit wat palmbomen, ain kovviebarretje woar elkenain zat. t Dörpke bleek in 1865 opricht as overstapstation, mor nou wie 4 uur wachten mozzen, was ik nog nait overtuugd. Ik keek noar t monument in volle zun. Touvalleg las ik net dizze week dat traain tussen Leeuwarden en Stad in 1866 opricht was. n Joar loater as dit stille, sikkom prairie-dörp. Wie luipen n rondje deur de stroaten en kochten n flezze wotter bie n old mannetje. Meer was der nait. Wie gingen op n bankje onder n poar palmbomen zitten en ik pakte mien Harry Hole derbie. ‘Nummer vaaier,’ zee ik.
‘Vaaierde liek?’ vroug laif.
‘Oh nee, toch nait, hai leeft nog.’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

8 − twee =

Terug naar boven ↑
  • Literatuur activiteiten

    Geen nieuwe activiteiten