Algemeen Grunneger dainst Amsterdam

Gepubliceerd op 21 december 2017 | door Jan Glas

1

Impressies van de Grunneger Dainst in Amsterdam 5 november 2017

Dit joar 5 november was der weer n Grunneger dainst in Olle Lutherse kerk in Amsterdam. Simon Drost was aanwezeg en schreef n verslag.

Het is nog vroug, haalf tiene, mor der kommen al n haandvol lu Olle Lutherse Kerke binnen. Dudelk te zain, dat ze hier vrumd binnen. Elk kiekt bewondernd noar t prachteg blaauwe plefon en vanzulf het ogenkostelke örgelfront. Kerke lopt langzoam mooi vol (roem vaaierhonderd).

Woar kommen ze aalmoal vot?
Vanzulf van en om Amsterdam, verder Rotterdam, Mijdrecht, Doorn, Den Haag, mor ook lu dij in Stad wonen en de nacht over in n hotel west binnen.
Ook gemainteleden van Evangelisch-Lutherse Gemainte kommen binnen.

Hanne Wilzing, dij ons welkom hait, gef ok dizze kerkgaangers aandacht:
“Veur de kerkgangers dij gain Grunnegs proaten: Grunnegs is goud te doun en as t nait te verstoan is, den geef joen buurman mor n steutje en vroag wat t betaikent.”
“Het Lutherjoar -viefhonded joar reformatie- trilt ook in dizze kerke nog noa dus wie goan gewoon deur mit hervormen tot we bie de 600 joar binnen.”

Wie kriegen om 10.15 uur spoedcursus ‘olle grunneger kerken’ van Jur Bekooy en heuren ook t verhoal van synagoge in Folkingestroat. De -gereformeerde- architect was inspireerd deur n synagoge in Berlien. Dij zag der wel slim jouker (duur) oet, mor geft niks, n enkel torentje kon der wel òf, dus zo’n soort staait der nou op. Stichten zit nou op 88 kerken en verwacht binnen drij joar op 100 te kommen, vanwege de veule kerksloetens. “Belangriek dat kerke der nog is, mor veul lu vinden dat kerke oet tied is” zegt der aine tegen mie, “moar aiglieks is der nog niks veur in stee kommen. ”
“Het principe van de Stichten is: Wie geven kerke weerom aan t dörp. Lu doar mouten t zulf organiseren.”

Mor dizze mörn zingen wie prachteg vertoalde laiden en domie bidt en preekt over thema ‘Wat is wies?’. Zeker mit dat bidden heurde ik vrouger op Knoal wat bezunders. Eten bie n kammeroadje was doan en wie haren Grunnegs proat aan toavel. Allain Pa dee t daankgebed in Hooghollands mit lodege woorden. Asof ons God gain plat verstoan kon….
Over de ‘de vief wieze en vief dwoaze wichter’ sprak domie Donga. Achterof zee der aine: “ik vuilde vrouger aaltied kwoadhaid, omdat dij aander vief wichter nait mit mochten. Doarom kon ik nou nait goud luustern, wat ik wel begrepen heb is dat wie ons bie leven goud veurberaaiden mouten.”

Mor over wat wies is zong ook de zangeres Marlene Bakker en heur muzikanten: ‘Loat Grunn nait zakken’. En zo kwam actualiteit en theologie bie nander.
n Aander haar der muite mit: “Dij meziek haar toch niks mit n kerkdainst te moaken. ”
De mooiste klaank kwam van t örgel, woar Christiaan de Vries (gain Grunneger, wel Frais) de gezangen schoor gaf in n mooie lieste van veur- en noaspel .
En sommege oldskes zongen aan t ind mit n kloet in de strötte van het “pronkjewail in golden raand”.
Noatied vroug ik aan domie hou hai zuk veurberaaidt. n Regelplougke komt al bie nander in maai en stelt thema vast. En preek is al kloar veur de zummer.
As Knoalster is hai al laank leden noar de heufdstad ofraisd. “Mien Grunnegs is nait meer wat t west is, haalf put- haalf regenwotter, dus din is der tied genogt, dat Hanne Wilzing nog wat aan mien tekst schoaven kin.”

t Is nait aal doage kovvie mit kouke, moar veur dizze zundag is bakker Knol oet Stad goud bezeg west. En wel kent de bezundere smoak van Knol nou nait?
Smoak, noflekhaid, bie nander wezen, luustern en zingen, doarveur kommen lu noar dizze dainst. Moar most nait teveul vroagen wat ze mitnemen van de preek. Joa, wies wezen…
Grunneger dainst is n mooie reünie van mainst olle grunnegers.
Blift de vroag, hou laank onze Grunneger toal nog sproken wordt en een Grunneger dainst nog verstoan wordt.
Mor over ain joar willen mainsten weerom noar Amsterdam, de Olle Lutherse Kerke. Doar trilt der toch aargens wat, de Geest van vrouger!

Simon Drost
Hoevelaken

Foto: David Drost

Tags: , , , , ,



One Response to Impressies van de Grunneger Dainst in Amsterdam 5 november 2017

  1. Marius Gort says:

    Mooi verslag, Simon. Zo kan je nog even nagenieten!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

7 + 18 =

Terug naar boven ↑