Column

Gepubliceerd op 29 januari 2015 | door Webloug

2

‘IKEA prinses’ column van Aly Freije

IKEA prinses

Sums kin ik der nait onderoet, mot ik noar Ikea. Diskeer omdat n kussen, doar kocht, deur kadde verrepeld is en wie weer zulfde kleuren willen. En t potje vledderblözzemsap is op. Wie binnen te vroug, dus ook mor even noar t restaurant veur n euro mörgeneten. t Lopt flink vol. Noast ons strikt n familie hìn. n Moeke mit vief kinder, de vaaier jonges in de leeftied van acht tot tien, schat ik. t Wichtje is van zulfde leeftied as d’oldste jong. De moeder dragt n heufddouk en t wicht het n sjaal omsloagen, dat weg wil glieden van heur heufd. Ze trekt t elke moal weer omhoog over heur golvende hoaren.

Wie eten noast mekoar n broodje aai. Mit veul getrek aan mekoar eten de jonges, roupen haard. Moeke kikt somber veur zuk oet, t wichtje helpt jongsten mit pellen van t aai. As d’broodjes haalf op binnen, schoeven jonges van toavel. Ze krigt ale jazzen over heur hìn gooid en ze goan der vandeur, jonge prinsjes al. Zai vlaait ze wat beter over knijen, schoeft de bordjes bie mekoar. Moeke verdwient, meschain noar toilet, en t wichtje zit stil, schikt aalgedureg heur sjaal weer over t heufd. Ze wacht, mit jazzen op schoot, in t gareel, op heur toukomst.

Wie goan de winkel in, binnen vanzulfs weer dwongen om de haile route te volgen. Zoas aaltied, schoeven we wat extras d’winkelkar in, keerzen, n handeg flessenrekje en opbaargmappen. Mor ik heb nog aaltied dat wichtje veur ogen, heur blik.

En wat hoat ik dat dwangmoateg lopen volgens n vaste route. Mor ook mien aigen consumptiedrift. Ik zai n oetgang noar boeten. ‘k Wor roar in kop, kom mit, hier kinnen wie de route verkörten’, roup ik noar L. Teglieks heb ik deur al opengooid en run. k Heb beeld van t wichtje nog veur ogen, ze is rank en kin vast haard runnen, haarder as ik.

n Schaarpe bel snidt deur mie hìn. Twij IKEA bewoakers runnen op mie òf, wenken mie terugge, asof ik n winkeldaifstal pleeg. Ik draai mie om, Nooduitgang staait boven deur.

t Wichtje wait niks van zukse deuren, nog nait.

(Foto © Jan Glas)

 

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



2 Responses to ‘IKEA prinses’ column van Aly Freije

  1. Jan de Jong says:

    Prachteg Aly.
    Dat blift hangen.

  2. Germaine says:

    Prachtig mooi Aly! Ik zie het helemaal voor me….

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

20 − vijf =

Terug naar boven ↑
  • Literatuur activiteiten

    Geen nieuwe activiteiten