Column Chris Kiel, column

Gepubliceerd op 5 juni 2015 | door Webloug

0

‘Holland op zien mooist’ column van Chris Kiel

Holland op zien mooist

Holland op zien mooist is n dubbeltentoonstellen van de Hoagse School, woar de helfte van in Den Hoag, de rest in Dordrecht te zain is. Doar wollen mien vraauw en ik nait allain t Hoagse, mor toch ook t Dordtse dail van zain.

Mor, loaten we wel wezen, even noar ons residentie mit traain, dat mag den nog te doun wezen, Dordrecht is wat anders. Dat is ja n ommelandse raaize, ook as je nait over Zoltkamp goan.

Om Dordrecht en den veural t Dordrechts Museum ging t dus ainglieks.
Mor omdat gain van ons baaident de leste viefteg joar in Rötterdam west was, we nog nooit deur de Biesbosch voaren harren, we Tollens nait langer op zien woord leuven wollen (“Waar Maas en Waal te zamen vloeit en Gorkum rijst van ver”), wie ook aigen-ogeg controleren wollen of Alva zien brille inderdoad op 1 april 1572 kwiet worden was, har mien vraauw n hotelletje in Bergen op Zoom besproken. Want viefteg joar noa Brielle het volgens Valerius ook Berg op Zoom zuk vroom holden en de Spanjoarden ofpoeierd. Ook dat wollen wie even noatrekken. As t aal klopde, zollen we t dus nait Spoans benaauwd kriegen.
Kregen we ook nait, mor wel Siberisch kold in maaimoand. t Was doar dus dudelk nait Spoans meer.

Verder was de Biesbosch inderdoad n modderpalternaksie, zo as meester van de vaairde klaze op legere school ons verteld har (mor wel n schiere) en was Gorkum in de verte werkelk zichtboar vanof Slot Loevestein. Dat har Tollens goud zain. Terecht dus dat der in Rötterdam n standbeeld veur hom staait, al is t ding wel slim groot. t Beste is, dat je t in t perspectief van de twintegste eeuw bekieken: boven vanof de Euromast. En den nait inzoomen, den krig Tollens zien verdainde proporties.
Ook wieder was Rötterdam oardeg opknapt in dij viefteg joar. Ze harren zuk doar zo laank oardeg schier redt zunder ons baaident, wat de Hoagse school zunder Jozef Israels en H.W. Mesdag vast veul minder lukt was.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

20 − 18 =

Terug naar boven ↑
  • Literatuur activiteiten

    Geen nieuwe activiteiten