Column Jan de Jong, column

Gepubliceerd op 23 maart 2015 | door Webloug

0

‘Het Vleesch is zwak’ column van Jan de Jong

Het Vleesch is zwak

Ik blief stoan en kiek heur aan. Zai mag der best weden. Tjonge. Hond gaait ter zulfs veur zitten.
‘Hangen loaten hur!’ n Fietser belkt en laagt.
Net as k weerom roupen wil dat vouten en bainen mie zeer doun en doarom stoan blief, toetert der n auto en swaait ain.
Ik mout gniflagen. Dit kinst ja nait oetleggen.

n Schier wicht, mit n wupgat en mor min goud aan, ien n bushok dij joe aankikt.
n Billboard. Toupazzelker kin gewoon nait.
Benijd wat doar nou weer veur n Grunneger woord veur opbedocht mout worden.

Gedachten goan weerom as wie noar hoes lopen. Oere, dat wazzen dou hail aandere tieden. Op zuik woar moeke ter Meulen Post en loater Wehkamp opburgen haar. Vraauwlu ien ondergoud en n Berend Haarms. Goud opburgen.

Thoes op baank denk k aan n christelke partij en buren van n blok wieder. n Grode hoesholden. Moeke dij kwoajonges aal mörns achter t hoes oetswaait.
n Hail koppel. Oldste jong mit doppen ien oren en doem op mobiel ien rechterhaand dij leutjen eerst votbrengt. Nog n leste zeggen van moeke. Dij kaant om. Dou der om denken, k wil joe doar nait bie bushokje laangs hebben.
En oavends, as t waarm eten op is pa zien schoare overzigt en nog n stukje veurleest.
‘En leid ons niet in verzoeking, maar verlos ons van de boze’.

Ik pak kovvie en goa veur t glaas stoan. Veujoar. Snijklokjes. Witter as wit bestaait nait volgens mie. Moagdelk wit. Wat dat ook mor weden mag. Ik kin doar aalweg wel noar kieken en mie verboazen.

Noakende wiefkes.
Hou verzinnen zai t.
Grunnegers. Ampaart goud

Aal wat ter ien toen rond runt en vlugt zel eerstkommende tied din wel van leg weden.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

twee + zeventien =

Terug naar boven ↑
  • Literatuur activiteiten

    Geen nieuwe activiteiten