Column Jan de Jong, column

Gepubliceerd op 3 juni 2015 | door Webloug

0

‘Herinnerns’ column van Jan de Jong

Herinnerns

Dood lopt aalgedureg wel ais n moal deur mien leven. Dat het haitied al zo west.
Ik bin nait baang veur hom en blief mainsttied eefkes bie hom stilstoan.

Dood is ‘omkeerboar’ vertelt ons n bekend schriever, dichter en kunstenoar.
Dat is zo en t blift dood. Wat wie ook geleuven. Stelleg en n zekerhaid dij elk het.

Geregeld kom k op t kerkhof groaven onderholden van schoonollu en femilie.
Zai zellen der netjes bie liggen. Dat heurt bie mie, en dood. Respect veur t leven.

Mit n bounder en n emmer wotter loop k rusteg noar t graf. k Huver. Hier en doar zit nog
n bladje aan bomen. Onderwegens lezen. Grafteksten en joartallen. Tied van leven. En dood.
Bie t graf blief k haitied stilstoan, sums goa k eefkes op raand zitten. Gedachten.

Komt n luddek vraauwtje aanschoeveln deur t blad, twij rieg wieder. n Mutske boven n vrundelk
gezichtje. Stief votdoken ien n dikke jas mit sjaal. n Boske chrysanten ien ain haand en aander n
buusdoukje. Zai prat ien heur zulf.

Op t baankje, t graf tegenover gaait z’even zitten. Hai ligt doar mooi heur k.
Der ligt wat, op houk bie stain. Zai komt ien de bainen. Och, n leutje zwieniegeltje.
Zol e ook dood weden.

Zai gaait ter bie zitten, op raand van graf.
Baal mit stiekels komt ien bewegen en begunt te proesten en te koggeln. Komt n snoetje oet en stekt
n neuske ien lucht. n Poar wotterge oogjes kieken heur aan.
Din waggelt e noar heur tou.

Zai mout even laggen.
Hai is niks veraanderd.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

4 × 2 =

Terug naar boven ↑
  • Literatuur activiteiten

    Geen nieuwe activiteiten