Algemeen Laiwoarden

Gepubliceerd op 5 juni 2018 | door Jan Glas

0

Henk Scholte kikt weerom op n gesloagde Grunneger Weke in Laiwoarden + foto’s

De Grunneger weke in t Toalpaviljoen MEM in de Prinsentoene is weer veurbie en wie kinnen weeromme kieken op n biesterboarleke tied in de culturele Hoofdstad Laiwoarden. t Was aal mit aal slim de muite weerd en n deursloand succes.

Op zundagnommedag 20 maai, dij in taiken van jonk en old ston, wuir t stokkie deur de Broabanders Cor en Jos Swaneberg, voader en zeun, aan ons overdroagen. De Grunneger schiever Henk Puister druig dou as opener n gedicht veur dij e specioal veur de gedichten estafette moakt har. Om dat aan te geven is der elke weke n toupazelke en aansloetende gedicht in n streektoal dij din centroal staait. Wie waren dizz’keer de negende Nederlaandse streektoal op rieg. Wieders huil Henk Puister as de senior van t Grunneger gezelschop n uutgebraaide inlaaiden, over hou hai der tou kommen is om in t Grunnegs te schrieven. Hai gaf op zien bekinde smuie menaaier t pebliek n inkiekje in zien schrieverij. Hai stelde doarnoa de jonge ladjeskirrel Krzyzstof Groen veur, dij n meer din degelke performance deelzette. Aal mit aal was t ondanks dat t smoorhait was, wel n goie opkomst in t paviljoen van Lân fan Taal.

Dunderdagoavend 23 maai ston in taiken van de meziek. Grunneger laidjesmoaker Bert Hadders & Joost Dijkema muiken der mit heur baaide n feessie van. Bert har tussendeur schiere anecdotes om zien laidjes in te laaiden en dat vuil haile best bie t pebliek, dij doar bie zetten deur t aanholdend applaus haile goud op reageerden.

Op zundag 26 maai haren de Grunneger t leste woord en kwam ons de Zeeuwse delegoatsie in de muit. Dizze nommedag stonden d’optredens hailemoal in taiken van Toal en Toukomst. Waarktitel: De toekomst van het Gronings en Zeeuws dialect | Hoe kunst en wetenschap het Gronings/Zeeuws dialect (on)bedoeld beïnvloedt. De Grunneger zangeres Marlene Bakker en de waitenschopper dr. Goffe Jensmoa gavven ofwizzelnd n inlaaiden over hou zai de toukomst van t Grunnegs zain. Marlene har doarbie ook de muzikant-gitarist Bernard Gepken mitnomen en aan d’haand van heur verhoal luit ze ook n poar laidjes heuren. Jensma gaf mit n goud deurwrochte lezen de situoatsie in Grunnen weer en hou t volgens zien idee wiedergoan kin mit t Grunnegs. Streektoalfunctionoaris Veronique de Tier uut Zeeland sloot hier noadloos op aan. De verhoalenvertelster Sankie Koster uut Zeeland sloot dit onderdail of mit n smui verhoal dij der bie t volk huil goud ingong. Tot besloet wuiren baaide etafettegedichten veurdroagen en uutwizzeld en druig Goffe jensma symbolisch t stokkie over aan Veronique de Tier en opende doarmit de Zeeuwse weke.

n Fotoverslag van de Grunneger weke in Laiwoarden is HIER te zain.

Wie kinnnen mit recht weerom kieken op n smoorhaide Grunneger week in Fryslan dij t der echt tou doen het.

Henk Scholte

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier × 4 =

Terug naar boven ↑