Muziek harbert grezel

Gepubliceerd op 3 maart 2015 | door Jan Glas

0

Harbert Grezel woensdag te gast in Twij Deuntjes

Woensdag is ‘Herbie’ Grezel te gast in Twij Deuntjes. Meertmoand streektoalmoand levert ons weer veul nije meziek in t Grunnegers op. Wie hebben leste tied d’ain noa d’aandere nije meziekuutgoave bie de kop. Vanoavend stoan we stille bie de nije CD ‘Mous’ van Snikhait van Harbert Grezel.

Wie goan in Twij deuntjes evenpies n stroate om mit Harbert Grezel van Snikhait. En dij stroate ligt aargenswoar in Winschoot tussen t Maarkplaain , de Laangestroate, Engelstilstroate en din t haile ìnde weerom en dat nog deur Torenstroate en din ook nog over t Israëlplaain. Bie t beluustern van zien laidjes vaalt ons din ook vot op, dat e bie t schrieven goud gebruuk moakt van dij alledoagse toal van de stroate in Sodom. Van huus uut wuir hom dizze stadstoal, dij nog mit jiddische en bargoense uutdrukkens deurweven is, mit de paplepel ingoten. Hai zegt doarover: “De meziek komt bie mien moeke vot, want dij was hail actief as hoornbloazer bie de fanfare, en mien pabbe was de man van de toal en de Rock and Roll”. Op n haile aigen, deurdochte menaaier moakt Harbert gebruuk van meziekstijlen dij ons herinnern aan boogie woogie, blues en Jazz, mit woddels, noar aigen zeggen, uut de joaren viefteg. Toch is zien meziek nait zomor makkelk in n vakkie te stoppen. Hai zet aal dij stijlen noar zien aigen haand en moakt der aalgedureg weer hail wat aans van. Bie hom zit de kracht dudelk in t rechtou-rechtaan en in d’ainvold der dingen. Aine van zien grode veurbeelden, woar hai zuk slim verwant mit vuilt, is veur hom Louis Jordan. Hai let van hom ‘Coleslaw’ heuren. Wieders om in dij typische cadans van swingblues te kommen stoan we dizze oavend ook even stil bie ‘Who’s that left here while ago’ van Peg Leg Sam. Harbert Grezel serveert ons mit de nog uut te kommen CD ‘Mous’ van zien band Snikhait, vrouger High Temperature, vanoavend n schiere mix aan nije laidjes.

Speulliest is HIER te bekieken.

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negen + 17 =

Terug naar boven ↑
  • Muziek activiteiten

    Geen nieuwe activiteiten