Algemeen Toezeboudel

Gepubliceerd op 1 december 2018 | door Jan Glas

0

Hans van der Lijke en Henk Puister in datteg joar Toezeboudel

Noa datteg joar binnen Gerard Lunshof en Toezeboudel allaank gain onbekenden meer in t Grunnegs. Noast t radiopegram in t Grunnegs stoan der op Gerard Lunshof zien webstee over de honderd verhoalen dij opnomen binnen en uutzonden in zien radiopergram. Verhoalen deur de schrievers zulf veurdroagen en te zain op Youtube. Studiowaark is der veur Gerard nait meer bie. ‘Vandoag de dag is dat nait meer neudeg’. ‘Elke weke proat ik wel mit meziekanten, schrievers, of lu dij op n aander menaaier mit Grunnegs aan loop binnen.’
Veur datteg joar terugge, is t veur hom, apmoal begonnen bie de lokoale omroup Radio Compagnie. Nou waarkt e thuus en levert zien pegram aan 6 lokoale omroupen. Hai waarkt veur HavenstadFM, HarenFM, RTVGO!, RTVeen, Radio Compagnie en Omroep Westerkwartier. Dus, is Toezeboudel over de hail pervinsie te beluustern. Het geval wil dat HarenFM stoppen mout, dus doar mout wat aans veur kommen. OOGTV? Doar is e mit aan t onderhandeln. Via zien webstee woar al zien uutzendens herhoald en uutzonden worden is e vanzulven over de haile wereld te beluustern.

Dat zien webstee goud roadpleegt wordt ken e zain aan t bezuik. Veur ain pergram is e toch gaauw
n poar uur aan loop. Gesprekken mit gasten, montage, meziek uutzuiken, webstee biewaarken,
filmpjes moaken op zien webstee en de uutzendens deursturen noar de betreffende omroupen
en din t neudege t schriefwaark. Ook wordt zien pergram op ‘Webloug’, webstee veur t Grunnegs,
ploats. Gerard dut ales alleneg. Leste weke was t slim drok omreden hai n gesprek haar met Fré
Schreiber, dij uutkomt mit n Grunneger Sunnerkloasbouk. Totaal gesprek en verhoalen twijendatteg
menuten. Alles mout monteerd worden en de verhoalen op film zet. Dizze filmpjes stoan ook op
www.gerardlunshof.nl. Gerard zien webstee. Ook n verhoal van Henk Puister, vaste mitwaarker,
haar n verhoal en mos bewaarkt worden veur uutzenden en webstee. Dat Gerard Lunshof zukswat
al datteg joar volholdt, doarop zegt e,’Om dat t aibels schier waark is!’ ‘Verdaint heb k der niks
mit, t kost mie allenneg mor geld.’ Weke 49 het e zien 1560 uutzenden.
Datteg joar dus! (tekst is uut kraande)

As gasten binnen nuigd Hans van der Lijke en Henk Puister. Baaide manlu binnen al vanof t begun bie Toezeboudel betrokken. Hou Gerard der tou kommen is radio te moaken is kommen dou e n moal nuigd wui in t zotterdagmörgen pergram van Radio Noord mit Jaap Nienhuis, Wienus van der Laan en Leni t Hard. Dij vanzulfven, in opnoames van dou, te heuren binnen in 30 joar Toezeboudel.
As joe t nait missen willen gewoon luustern goan of goa de uutzenden terugge luustern.
Techniek, soamenstellen en prizzentoatsie Gerard Lunshof.

Luuster via www.gerardlunshof.nl

Wie loaten heuren aan meziek:

Henk Drenth mit Grensgeval – Henderk hemmel die (Henk zien eerste Grunneger tekst)
Hans van der Lijke – As is AS (Hans zien eerste opoame in n geluudsstudio. Studio Spitsbaargen 1991)
Age van der Velde – Opa zien Harmonica (Tekst Henk Puister. n Tekst mit n bulde jeugd herinners)
Hans van der Lijke – Seconden (Twijde van de cd box ‘Dagbouk van n troubadour’)
Krzysztof Groen – Weerom noar vrouger (Noar n idee van Krzysztof Tekst Henk Puister) (Toezeboudel-opnoame)
Hans van der Lijke soamen mit Linde Nijland – Curacao (Tekst, in t Nederlands van Hans, dat gaait over
zien tied dat e in t leger zat op Curacao).

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

9 + 5 =

Terug naar boven ↑