Column Jan de Jong, column

Gepubliceerd op 9 maart 2015 | door Webloug

1

‘Hai zigt ales’ column van Jan de Jong

Hai zigt ales

Bie t deupen luip t wotter ien mien ogen. Ik mos der votdoadelk oet. Domie kon der nait aan bèlken.

Mor k was veurbestemd domie te worden, zee oma. k Was ja oldste klaainzeun en verneumd noar opa. Wie mozzen haitied oma zeggen, dat was netjes.

Eerste moal zette oma fiets tegen kerk. Mien baaide haandjes hillen t zoadel stief vaast dou fiets langsoam onderoet glee. Mit baintjes vaast ien fietstas schoof k mit kop bie roege muur laangs. Nait janken hur brulde opa. Kwam volk kieken dou oma mie kop depte mit klonje. k Mos weerom noar hoes.

Sjonnie, zee juf. Wat vind je van dit verhaal van Job. t Eerste uur haitied n biebelverhoal. Liekt naarns op en k leufde der niks van. Klas hil oam ien. Juf ook. Zai kreeg kleur van heur hoar. k Mos der oet. Hoofdmeester kwam laangs en heuren woarom of k op gaang ston. Dat k der niks van leuf. Dit kin nait woar weden. Mit n braifke mos k noar hoes.

Ik mog mitdoun. Mit de goien. Mit stokken, speren, enden hoorntaauw en deksels van wasoakers bestreden wie aal t aander geleuf ien t dörp. Spoorleegte was t slagveld door roomse poepen, ofgeschaaiden, openboaren en hervörmden op pìns kregen. Tot ain bèlkte: doe heurst nait bie heur. Gain ain kon mie bieholden.

Aal dij nait griffemeerd binnen binnen haaiden zee meneer op Ulo. Ong! Of hai ons Laimeneer was! k Mos der oet en van directeur noar hoes, der mor ais goud over prakkezaaiern. Of k dat doan haar wol e waiten aanderdoags. Joa. Hai vroug nait wieder.

Kezoatsie. Aandern werden ruier en begonnen ook al te vroagen. Domie snoof en vreef hom deur t hoar. Je hoeft niet weer te komen. Jij weet alles al. Ik mos der oet.

t Leven vol vroagen as antwoorden.

Nait meer van dizze tied, lees ik.
Denken ien oorlogen, zaiktes, honger en aarmou.
Het niks van doun mit Hom.
Dat dut ter nait tou.

En Jezus is fictie.

t Is nog nait over.
Ik blief schrieven.

Tags: , ,



One Response to ‘Hai zigt ales’ column van Jan de Jong

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

drie × drie =

Terug naar boven ↑
  • Literatuur activiteiten

    Geen nieuwe activiteiten