Literatuur

Gepubliceerd op 3 april 2014 | door Webloug

0

Hadders & Glas 13 april ien café Mulder ien Stad

Muzikant Bert Hadders en dichter Jan Glas hemmen heur krachten bundeld ien ‘Hadders en Glas’. t Eerste gezoamelke optreden is zundag 13 april om 16:00 uur ien café Mulder ien Stad. n Pergrammoa mit poëzie, muziek en staarke verhoalen. Dit alles culinair omliest.

Bert Hadders is de veurman van de Veenkolonioale popband De Nozems. Tiedens t optreden van ‘Hadders en Glas’ speult hai zien nummers van de Nozem-cd’s en nije composities dij hai twij moal ien moand schrift veur t Radio Noord-pergrammoa De Centrale. Nummers as ‘De Pekelder Waals’ en de turf-gospel ‘Beloofde Laand’ worden ofwizzeld mit radio-hits as ‘Elvis, Keuning Van De Bunermond’, ‘Zo Mui’ en ‘Poolse Bruid’. Hadders braait boudel ankander mit staarke verhoalen, voak mit n beste korrel zolt te nemen. 
Jan Glas publiceerde n zestal dichtbundels ien t Grunnegs en Nederlands. Zien achtergrond as beeldend kunstenoar is dudelk te maarken ien zien poëzie; de gedichten binnen beeld- en klankriek en lainen heur bie oetstek om veurdroagen te worden. Glas leest veur oet ‘Dubbel Glas’ (zien verzoamelde Grunneger gedichten) en oet de Nederlandstoalege bundel ‘Als was zij mijn vrouw’ en der wordt nij waark veurlezen. Over Glas zien veurlezen schreef journalist Joep van Ruiten: ‘Weinig dichters beschikken over zo’n fraaie stem, strelend en swingend.’
Twij mannen met elk n hail aigen karakter vienden nkander ien n gezoamelk pergrammoa. De ain is geboren op t Hogelaand de ander komt oet de Veenkolonieën. Zo Grunnegs as t mor kin mor ver veurbie de pervinziegrinzen.
Zundag 13 meert om 16:00 uur
Entree: vergees
Café Mulder, Grote Kromme Elleboog 22, Stad

‘Hadders en Glas’ binnen te boeken via: haddersenglas@gmail.com

Tags: , ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten