Column Jan de Jong, column

Gepubliceerd op 17 november 2015 | door Webloug

0

‘Haardheurend’ column van Jan de Jong

Haardheurend

Peter Knoope*, Nederlands terreurexpert woarschaauwt. Wat wie veuroetgang vienden, vienden zai neokolonioal. Wie dringen ons denken over geschiedenis op aan rest van wereld. Wie hemmen der gain idee van wat zuk ontwikkelt. Kwoadhaid, ontevredenhaid, antiwesterse gevuilens.

Moakboarhaid van toukomst: wereld wordt beder, wereld zel veraandern, ons economie zel gruien. Mor veur veul mìnsen is tied hail wat aans. Dat gaait nait over mörgen, mor over guster. Wat hemmen wie mitmoakt, wat is der mit mie, mien cultuur, mit mien veurolders aan de hand west. Honderden joaren van geschiedenis as bagage op elk zien rug. Toukomst is n fantesie.

D’eerste stainen vlaigen ons om d’oren. Wordt schoten.
Sjofeur geft n stroal gas. Ien ain haand t geweer en mit aander hol k mie stief vaast. Mit n noodgang vlaigen wie bie stroat laangs. Drij open verkennings jeeps mit mitrailleur. Kilometers wieder stoppen wie. Swiegend worden der wat stainen votsmeten en wotter dronken. Wie hemmen t weer red.
‘Ik zol t ook doun,’ zegt ain.

Libanon. Deur vluchtelingenkampen, Sabra en Shatila*.
t Gezicht van geweld, kiender, ol minsen en vraauwen, n opholden haand, t voel van aarmou bie stroat.
t Stee Damour* wie binnen stil, t beeld van dood, t moorden van even leden.

Drokte. Ezels mit pakkelarrie, auto’s mit hoesroad op dak, ol mìnsen mit n handkaar. Veur twaalm smirregs votweden, Israel gooit boudel plat.
Ik krieg n opdracht: ales tegenholden, dörp ofgrendeln, veurkom n vluchtelingenstroom.
‘Mìnsen dij op loop binnen holden ie nait tegen,’ zeg ik.

Niks òfzetten. Wie binnen tussen heur ien stoan goan. Proaten en nog ais proaten.
Der weden. En der maank blieven.
Granoaten achter en veur t dörp. Aal dichter bie.
Vroagende ogen, roek van angst dailen.
Wie hemmen t weer red.

Zes joar old en verhoezen.
n Dörp mit vief kerken. Allinneg openboaren haren gain kerk.
Was gain Hervörmde schoul, k mos noar Griffemeerde. Ik heurde naarns bie. Allinneg bie t vechten ien spoorleegte tegen openboaren en roomsen mos k mit doun. Vrijgemoakten wazzen dikke baangeschieterds en gingen veurtied al aan loop. Mit stokken, swoarden, speren, beschaarmd deur ol deksels en potdeksels haauwden wie nkander kop stukkend.
n Wereld verdaild ien goien en slechten.
En zendingsbuskes op bozzem.

Bron: http://www.knack.be/nieuws/wereld/terrorisme-expert-knoope-een-groot-deel-van-de-wereld-haat-ons/article-normal-624191.html
Bron: https://nl.wikipedia.org/wiki/Bloedbaden_in_Sabra_en_Shatila Noa wie der zaten.
Bron: https://nl.wikipedia.org/wiki/Bloedbad_van_Damour Veur wie der zaten.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

3 + 20 =

Terug naar boven ↑
  • Literatuur activiteiten

    Geen nieuwe activiteiten