Column Fieke Gosselaar, column

Gepubliceerd op 19 januari 2018 | door Webloug

1

‘Grunnen stoakt’ column van Fieke Gosselaar

Opains stel ik mie veur om haile pervinsie Grunnen plat te leggen. Dat elkenain – van Lauwerszee tot Dollert tou van Drenthe tot aan t Wad, om zo mor te zeggen – elkenain gaait plat. Misschain huift t nait ains heul laank te wezen, n uurtje? Net laank genog om t goud op te maarken. Haile pervinsie stoakt! In dij tied binnen alle ketoren leeg, alle winkels leggen boudel even stil, alle auto’s en buskes stoan in garage of laangs kaante van weg. Elkenain dij op stroat loopt, stopt as Ol Grieze t haile uur sloat. Elkenain holdt heur adem in.
Nog snel wordt der n boeskool ofrekend bie gruinteboer. Nog snel wordt der n pakje bezörgd. Hail even wordt der n houkje ofmoakt van n stoupe, n trui wordt ofrekend bie kassa, n envelop wordt dicht likt, n kous van ol vraauw wordt aantrokken, n leste alinea wordt schreven, n rekensom wordt ofmoakt, n Verdachte kriegt nog net zien leste woord en den is t overal in pervinsie stil. t Is n uur laank stil.
n Verslaggever van NOS is ainege dij in zien auto ridt, want ook RTV Noord is stil. Verslaggever zegt hou indrokwekkend dizze stilte is, elkenain in pervinsie Grunnen stoakt, alle minsen ainsgezind mit nander veur mekoar. Elkenain loat zain dat ze wachten, dat ze gain woorden meer over hebben veur heur booshaid en heur machtelooshaid. Dizze moal blieven ze, mit kop fier overend, stil. Verslaggever stopt bie n poar auto’s en n buschauffeur op snelweg, mor ze willen niks zeggen. Ze kieken camera aan. t Is dudelk.
Verslaggever richt zien camera op Grode Maarkt woar minsen as in n film stilstoan. Op t laand even boeten Stad lieken koien zulfs nait meer te kaauwen. Verslaggever sjeest deur pervinsie hin. Hai prebaaiert n viske te bestellen, n kraante te kopen, of zomor n gemaintehoes binnen te lopen. Niks. Naargens binnen minsen. Verslaggever zet zien microfoon tegen grond aan en den heurd hai wat. t Borrelt onder onze pervinsie. Hai gaait liggen, legt zien oor tegen grond aan en dizze moal heurt hai veur t eerst onze bodem, dij zoch mor nait stil holden kin.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , , ,



One Response to ‘Grunnen stoakt’ column van Fieke Gosselaar

  1. Ron Hemelrijk says:

    De hele provincie plat.Gewoon doen! Ik doe mee.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vijf × 4 =

Terug naar boven ↑
  • Literatuur activiteiten

    Geen nieuwe activiteiten