Column Henk Puister 620 column

Gepubliceerd op 11 januari 2016 | door Webloug

0

‘Grunnegs mit Swier’ column van Henk Puister

Grunnegs mit Swier

Was ais n jonge, aankomende Grunneger dichter/schriever. Hai was net op vlinthaarde stroatstainen smeten. Op nij toukomstploatje van bedrief was gain plekkie veur hom. Van zien piene en verdrait perbaaierde hai zok lös te moaken in gedichten en loater ook in verhoalen. Hai schreef of zat Duvel hom op hakken. Gemoud wui aal roemer. Ondertied schreef e sollesietoatsiebraiven. Zunder sukses. Gainaine haar n spier verlet om hom. Begun tachteger joaren veurege aiw. Krizestied. Ook veur n jongkerel van amper daarteg. Twij tiedschriften zagen t licht: Krödde en Toal en Taiken. Zai waren wies mit zien schriefsels. Johan van Winschoter Kraande sloot hom in aarms. Hai begunde mit laidjesschrieverij. Radio Noord zond ze uut. Daip van binnen gluide hai. Heurde der weer hailmoal bie. Minsen huilen hom aan, pruiten der over. Aan insperoatsie gain gebrek. Mit aal meer haartstocht schreef e op zoldersloapkoamer van t ol stee. Boas van Noord, Swier Broekema, nam hom apaart en luit fienechies waiten dat hai hom, jongkerel mit meugelkheden, veul in reken haar. Broekema: groot postuur op gebied van ons toal en kultuur. Minzoam glimlagende man, klouke bestuurder. Wel is nait wies mit n eerliekse scholderklap?

Siemon hoalde hom – mit daank aan Kröddemoeke Hanny – veur Noord. Hai wui vaaste gast in t popelaire streektoalpergram ‘Sloaperstil’, mit Zuzooien op zundagmörn van Ede Staal as uutschaiter.
Dou kreeg e n swoare vörm van suker. Dekselsgaauw aan slangen. Spoiten veur t leven. Groatmoager. t Ging bie zien gat òf goud. Op koamerbaanke zat n stil, wit moesie. Stopde n grode woagen veur t huus. Hai leesde in bragelvedde letters: Radio Noord. t Haart bonsde hom in haals. n Stevege kerel in n waarme, blaauwe Noordjek stapde uut, belde aan: ‘Dag mevraauw. k Mout joen zeun hebben. Elke weke gaait e n heurspultje veur ons schrieven.’
‘Doar in hörntje zit e,’ zee zien moe. ‘Hai komt nait bie Noord. Kiek hou of e der aan tou is. t Kin nait. Nou nog nait teminnend.’
‘k Mout joen zeun hebben,’ zee man weer. ‘En aans gainent.’ Hai hapde tou. Dij man holp hom in t ènde, was zien redder, zien held: Engbert. Hai leufde in hom.

Op dag van verhuzen ston e mit metras in haanden op trabbe van t ol stee. Ofschaaid noa zeuvenendaarteg (37) joaren. Dou n kört, kil telefoontje in t Hooghoarlemmerdieks: t was inainen doan veur hom bie Noord. Toezeboudel in zien kop. Keuken kreeg wotterge ogen.

Goud ketakt het e nou gelukkeg, mit Engbert, mit Siemon, mit Noord. Soms zugt e dij zaachtoardege man weer veur zok, mit zien innemende glimlaach veur ons Grunneger toal en kultuur: Swier Broekemoa.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

2 × vijf =

Terug naar boven ↑
  • Literatuur activiteiten

    Geen nieuwe activiteiten