Muziek

Gepubliceerd op 18 juni 2013 | door Webloug

0

Grunneger muzikanten 22 juni op Festival van de Geest

De Nieuwe Kerk ien Stad organizeert het Festival van de Geest 2013 (20-23 juni). t Is n aigenwies festval. Uniek. Gain feestje van de kerk. Nait t zoveulste cultuurfestival ien Stad. Mor net wat dwaars der middenmaank.

Themoa veur 2013 is ‘GEK’. De keuze veur dit themoa is iengeven deur soamenwaarken mit de gaistelke verzörgen van Lentis. Clienten van Lentis worden as oetvoerenden en bezuikers betrokken bie t festival. Verder slut t themoa noadlos aan bie t dwaarze kerakter van t festival. Kiek HIER veur t haile pergrammoa.

Zodderdag 22 juni is der n oavend mit allain Grunneger muzikanten. Muzikanten dij, zo zeggen ze zulf ien aankondegen op Facebook, ’t nait over t landschop en t vrije zicht hemmen, nait over wènst noar vrouger. Mor ien aigen toal over de sums raauwe kaant van t leven zingen’. Dat verbiendt de vaaier groepen en muzikanten dizze oavend.
Dizze verbondenhaid tussen de artiesten laaidt tot verrazzende onderlinge soamenwaarkens. Wie hemmen t over: Bert Hadders en de Nozems, Harry Niehof, Swinder en Marlene Bakker.

Harry Niehof is de veteroan van t gezelschop. Noa joaren ien t Engels zongen te hemmen kwam hai ien Spanje tot t besluut ien t Grunnegs te zingen. Doar kwammen n aantal fraaie cd’s oet voort. Muzikoal tapt Nieghof oet t Americana-voatje.

Marlene Bakker is jong, vraauw en ook nog ais zegend mit n prachtege stem. Heur oetvoerens van nummers van o.a. Ede Staal en Adele hemmen heur n aigen plek bezörgd ien de dialectpop.

Swinder is t geestes- en zörgenkiend van Bas Schröder. En het, zwaalkend tussen melancholieke poplaidjes en up-tempo folkrock, aal op veul plekken optreden. De single Annemarie is n beschaaiden culthit, binnen, mor juust ook boeten t dialectcircuit. Noa de zummer veschient t debuutalbum van Swinder.

Bert Hadders en de Nozems hemmen onderhand n stevege plek ien t Grunnegstoaleg landschop. Veenkolonioale teksten over internetbruidjes, deurwoarders, geleufszoeken en draank. Dat leverde hits op as De Poolse Bruid, Zo Mui, Volluk en Elvis, Keuning Van De Bunermond. Dit joar kreeg Bert Hadders de joarlekse muziekpries ‘Grunny’ van RTV Noord.

FESTIVAL VAN DE GEEST

Grunneger muziek op Festival van de Geest.
Zodderdag 22 juni
Aanvang: 20:00 uur
Entree: vergees
Nieuwe Kerk, Nieuwe Kerkhof 1, Stad

Tags: , , , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten