Column henk puister, column

Gepubliceerd op 24 februari 2017 | door Jan Glas

0

‘Grunneger Laidjesfestivaal’ column van Henk Puister

Grunneger Laidjesfestivaal

Zotterdagoavend 11 feberwoarie stevelde ik mit Gerard Lunshof, hai was in volle bepakken, deur de sniedende kolde noar de Akerkstroade in Stad. Hai zol opnoames moaken goan van t twijde Grunnneger Laidjesfestivaal.

Stoadegaan luip zoal vol. Achterin vond k n onopvalend stechie. Bie de lu van t geluud.
Wat der op podiom brocht wui was hail ofwizzelnd. Komt bie dat smoaken verschillen. Omdat k wied van t podiom òf zat, net as jury, mor dij haar teksten veur zok liggen, haar k muite om ale tekstregels zuver mit te kriegen. En mit t older worden loaten oren wel ais n stekie valen. Veuraal sunt ik zulf mit regelmoat in t Grunnegs schrief, let ik sekuur op teksten. Stoef veur de pauze kwam t duo ‘K2’, de bruiers Kruzengoa, veur t voutlicht. Mit heur twijbaaident monterden zai mie hailmoal op. Klaankkloare woorden mit inhold.

Noa de pauze wui t mit de verstoanboarhaid van de teksten aal beter bie mie. Ale tien dailnemers deden heur uterste kuren. As leste trad de twentegjoarege, in Polen geboren, Krzysztof Groen op. ‘En doar bin ik den nog,’ zee ons duveltje uut n deusie gevat dou Tineke hom inlaaidde en ondervruig op podiom. Hai vertelde dat hai al zestien joar in Nederlaand woont. Dou k veur t eerst mit hom pruit, n haile zet leden, luit e mie waiten dat e as vaarjoarege in n pleeggezin opnomen is in ons pervinsie. Hai was allenneg in auto noar t Der Aa- theater tou reden. k Vernam dat e vol gezonde spannen zat. Mit zien breekboar en puur veurkomen brochde hai, net as elke dailnemer, twij laidjes. Dou e van t podiom ofkwam en mie, mit n braide glimlaach, opzöchde was e deur t pebliek al bedolven onder de kompelminten. k Gaf hom n beste scholderklop! Jong stroalde.

Dou wuiren prieswinnoars bekind moakt. Eerste pries was veur Dion Bouwes. K2 won twijde pries.
Dou klom Krzysztof t podiom op. Daarde pries was veur hom. Krzysztofs pluspunten wuiren nuimd deur juryveurzitter Eltje. Ale prieswinnoars kregen n prachtege bos bloumen aanlangd.
Wat k zunde vond veur Krzysztof is dat juryveurzitter, n vakbekwoame laidtekstdichter in t Grunnegs, zee dat hai as ainege noadail zugt dat Krzysztof as jongkerel nait zien aigen teksten schreven haar.

Dizze Juryveurzitter het as old-onderwiesder aaltied aibels zien best doan om kinder d’laifde bie te brengen veur ons Grunneger streektoal. Den haar k jongkerel dij in Polen geboren is en dij as kind van zien pleegollu t Grunnegs mitkregen het, toch even n ekstroa pluum op houd zet en as veurbeeld steld? Mor, och, Krzysztof wui veur twijde moal op podiom roupen, omdat hai pebliekspries kreeg en zien twijde bos bloumen. Jurylid wezen is n ondaankboare toak. k Bin der zulf te laf veur en k mout dus aigelk gain proatjes hebben. Komt bie dat k aander belaangen heb in ons lutje mor wondermooie wereld van de streektoal.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

6 − vier =

Terug naar boven ↑
  • Literatuur activiteiten

    Geen nieuwe activiteiten