Column Jan de Jong, column

Gepubliceerd op 27 juli 2015 | door Webloug

2

‘Gruine vingers’ column van Jan de Jong

Gruine vingers

Zo’n week dij begunt mit n deurdeweekse moandag en t al vrijdag liekt.

Jannie haar op hozen laangs t bèr slopen. n Klaauwhoamer mit twij handen onder aan steel vaast. Dou aarms omhoog gongen en omdeel zaten zien handen om heur polzen. Zai was tegen muur valen.

Aiko. Om en bie twij meter groot. Glìnne vòllen ien zien bòllenek. n Vlès mit n startje whisky haar op t nachtkastje stoan. Midden overdag was t west.

‘Hai zol hom eefkes op kop haauwen loaten.’

Mor dat wis rechter nou onderhand al wel. Hai vrift hom deur t hoar, kikt noar officier van justitie en ais noar baaide verdachten.

Dattegers.
Jannie. n Luddek hoopke mìnsk ien n bult. Ain zesteg doar t aal kanten van òfdrupt. Wieder kieken as tusken heur tonen kin nait. Of z’aarns aanspould is.

Aiko. n Aaldoagensportschoulkerel mit gain zittend gat kikt aalgedureg rond. Benoam noar tribune. ‘Is niks van woar meneer de rechter. Eerlieks nait.’

Nog mor ais.
Of t nait vremd is.Twij auto’s, n vrijstoand arbaaidershoeske mit n lap grond, n grode swieneschuur van buurman ien gebruuk en aal doag sportschoul. En dat mit n oetkeren.
En hou t nou persies zat mit dij hennepkwekerij in buurman zien schuur.

Vremd? Dat wait e nait. Zien vriendin, dij haar wat bloumkederij. Hai kwam doar nait.
Ook nait op t asielzuikerscentrum? Veur aarbaiders in schuur?
Nee. Vriendin dee aan vrijwillegerswaark.

Rechter kikt op van stukken. Slagt n poar bladzie om.
‘Maar wat uw vriendin zegt is allemaal niet waar? Zij werd niet door u onder druk gezet? U dreigde ook niet met haar te verdrinken in de sceptic tank?’

‘Nee. Eerlieks nait.’ Aiko kikt nog ais rond en achterom.
Zij hoefde dus het geld niet aan u af te dragen?
Nee.
Hoe hij dan aan geld kwam.
Hai kreeg nou en din wat buussìnten van heur.
En wat voor bedragen mag ik rekenen vragt rechter.
n Poar tientjes of zukswat.

Ook n plietsierechter wil wel ais schaften.
‘Lekker, kovvie,’ zegt Aiko.
Jannie stoart nog aal noar schounen.
Op tribune rekken gonnent heur oet.

Bloumkederij.
t Haar apmoal zo mor woar weden kind.

Tags: , ,



2 Responses to ‘Gruine vingers’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

15 + een =

Terug naar boven ↑
  • Literatuur activiteiten

    Geen nieuwe activiteiten