Column Eddy de Jonge, column

Gepubliceerd op 24 februari 2015 | door Webloug

1

‘Groen – n Best Zangbouk’ column van Eddy de Jonge

Groen – n Best Zangbouk

Zo om en noabie begun 1976 hevve Törf opricht. Alex Vissering speulde gitaar en zong, Paul Scholtens dee de drums en ik was van de bas. Folkrock haitte dat dou nog. Harde electrische meziek woarst nait deurhen konst proaten. Wie haren teksten van Jan Legger en Geert Teis en doar muiken we zulf meziek bie. Teksten uut de joaren tiene en twintig. Törf het in sikkom 40 joar wel n inde ontwikkelns deurmoakt. Mor de belangriekste was wel de komst van dat ronde, 16 joarege ventje mit strohoar en klompen aan op n grode opoefietse in de zummer van ‘76. Henkie Prins (loater Scholte) kwam hailemoal uut Stadsknoal noar Muzzelknoal, woar we dou oefenden in de schounenopslag van de winkel van Vissering. Hai kwam om ons aan te pittjen en ons uut te leggen hou we t beste Grunneger folk moaken konden. Wie haren te doun mit n kenner, dat zagen we gliek. En op n goie dag kwam Henkie aanzetten met twij grode boeken, t Grunneger Zangbouk dail 1 en dail 2. Aigenlieks haitte t bouk bie de eerste druk ‘Oude en Nieuwe Groninger Liederen’. Laidjes verzoameld deur schoolmeester P. Groen in 1930.

Tot de dag van vandoage is t Zangbouk n beetje ons biebel west. Wat hevven we doar veul uut speuld! Prachtege laidjes, voak mondeling overleverd. In onze begunjoaren speulden wie Twij Köningskinder mit aal zien17 coupletten. En Siemn-maanj oet vrijen mit zulfs 25 coupletten. Dou Henkie ainmoal bie Törf zong muik e doar n hail toneelstuk van. Mor wie ontdekten doar ook haile mooie laidjes in as De Nijsverteller en Haardriederij op scheuvels te Winneweer. En prachtege melodieën zoas Bruidje schoon (in t Nederlands, mor optaikend in Zoltkaamp) en n Wonderlieke Raais. Doarnoast n serie mitzingers en mitstampers zoas Haide bollen mit kolle botter, Dou Hanske in de Schöstain zat, Mien mouder dij wol mie geven, Mien dochter wilt toe trouwen, Pestoor zien kou, n Boer wol nao zien naober tou en goa mor wieder. Aal mit aal n ‘fundgrube’ veur t Grunneger laid.

Dit soort laidbouken binnen wied verspraaid over landen as Engeland en Ierland. Ze hebben doar zulfs haile bibliotheken over traditionele meziek. En de muzikanten in dij landen hebben doar aaltied goud gebruuk van moakt. Alle grode folkbands in Engeland, Schotland en Ierland leunen op heur traditie. Mor in Grunnen? Imca Marina het ooit n ploade moakt in 1965 met materioal uut Grunnen en doarnoa was t, zover ik t overzain kin, allaind mor Törf dij zug doar mit bezeg huil. Der kwam van alles de leste 30 joar: country, pop, mitzingers, rap, aalmoal in t Grunnegers. Mor dat olle zangbouk ligt ter nog. Ik zol elk en ain dij Grunnegers zingt willen aanroaden om baaide dailen van Groen n moal ter hand te nemen. En nait schrikken as je eerst t Grunneger Laid zain, dij vot oversloan.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



One Response to ‘Groen – n Best Zangbouk’ column van Eddy de Jonge

  1. Jos Kwakman says:

    Leuk verhaal Eddy. Ik heb destijds nog wel enkele van die liedjes meegezongen als niet-Groninger, Gelukkig zongen jullie twee keer zo hard, dus mijn uitspraak deed er niet zoveel toe.
    Toch ben ik wel blij dat we de laatste jaren ook wat serieuzere teksten hebben aangepakt.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

13 + 6 =

Terug naar boven ↑
  • Literatuur activiteiten

    Geen nieuwe activiteiten