Column Chris Kiel, column

Gepubliceerd op 2 november 2016 | door Jan Glas

0

‘Griesdraaien’ column van Chris Kiel

Griesdraaien

Of k heur wel es eerder zain har, k duur t nait zeggen, mor t ken hoast nait anders. Wel is zeker, dat vanof mai 2006, noa de verkaizen tot mooiste van Nederland, ik heur geregeld zai. En elke keer springt der den even n vonkje over. Mainsttied allerdeegs n vonke.
En dat is roar. Want in eerste ploatse is t wicht nait echt n schoonhaaid. Ze is wel nuver, mor minstens n kwart van de wichter bie ons in t dörp is net zo mooi of allerdeegs schierder as zai. En as dat aaldeur vonken zol, kreeg brandweer ja nooit gain holdert weer.
Vrömd is t verder nog, omdat muziek en literatuur mie as ol calvinist altied veul meer aanspreken as beeldende kunst: k mout van t geheur hebben en nait van ‘wat veur ogen is’, allerdeegs nog nou k wat doof bin.
Ik dweep mit verschaaiden muziekstukken, loat mie voak mitslepen deur verhoalen en der binnen n bult gedichten (van t Middelnederlandse Egidiuslied tot Andreus’ Liggen in de zon om mor es wat hail verschillends te nuimen) dij k zo voak lezen heb, dat dat ainglieks nait weer huift: ik ken ze (zowat) van boeten.
Nou het de beeldenstörm ook weer nait zo in mien kop hoesholden, dat k niks mooi vin, mor as ik in t Rieks veur de Nachtwacht stoa of in t Louvre veur de Mona Lisa, den rak dat wel even mien kolle bovenklaaier, mor nait echt mien onderziel (zol Potgieter zeggen).
t Petret van Het meisje met de parel doarentegen gaait dwars deur mie hen, al nuimen de geleerden t gezichtje n tronie, de parel n stukje glas en al kik ze mie mor aan vanof n krantenfoto.
Ik hoop dat t dit schilderijtje nait vergaait as Eine kleine Nachtmuziek, ain van d’eerste klassieke ploaten dij k mooi begon te vinden, zo mooi dat k hom griesdraaide.
Zollen ze mie nou dit pareltje ook zo voak onder ogen brengen kennen dat het wit, het geel, t rood en t blaauw -dat hemels daipblaauw- ain gries gedwarrel wordt?

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

13 − 1 =

Terug naar boven ↑
  • Literatuur activiteiten

    Geen nieuwe activiteiten