Column henk puister, column

Gepubliceerd op 28 juni 2016 | door Webloug

0

‘Graham Nash en n haalve hippie’ column van Henk Puister

Graham Nash en n haalve hippie

In duustern zwaarf ik in n zwoule zummernacht langs d’wotterkaande over t aailaand van hippies en toukomstmeziek. Moeskestil rondomheer. k Schrik op deur n plons in t wotter. t Haart gaait mie as n röddekeudel tekere. Zeuventien bin k en op kampeervekaansie. Mit mien ainpersoonstintje stoa k stoefbie vuurtoren in De Cocksdorp. Hou wied is t nog lopen? Hailmoal aan t uutènde mout k wezen. k Bin zo flaauw as n podde, omreden mien huurfietse is vot. Nait stolen. Bloots even bruukt, vermoud ik. In popboerderij Sarasani heb k mie vernuverd maank hippies en aander laankhoaregen. k Vuil verwaantschop. ‘Everybody I love you,’ zoezelt mie noa in d’oren. Nummer van Crosby, Stills, Nash en Young. Elpee: Déjà vu. t Vaaste huuslaid.
Bakt veur t ulo-eksoamen. Op ain puntje. Noar ketoor wil k nait. Hier wil k aarbaaiden. Op Texel. Boerenwaark doun. Mit blode pokkel onder d’haide zunne. Heuvörke in d’verweerde haanden. Strohoud op. Soavends gezelschop zuiken en meziek luustern.
Dampen van genotsmiddeln hangen om mie tou. n Kweerse roek in neuze. k Stap steveg deur. k Gap van sloaperghaid. n Poar colaatjes heb k achter d’koezen. Meer nait.
Drijenzestig joar en witachteg hoar. k Zit thuus te kraandelezen. n Stuk over Graham Nash. In Blackpool geboren vierde hai suksezzen mit de beatgroep The Hollies in begun joaren zesteg.
Dou kwamen Crosby, Stills en Young derbie. Hemelse klaanken, bloudmooi van soamenzang.
Zweverg. Aal bie nkaander in Woodstock. Vrijhaidsfestival.
Graham Nash is van 1942, lees k. Hippie van varenzeuventeg (74). Ruierge tied overleefd. Nog aaltied kin e t nait loaten en drift meziek hom. Ideoalen. Minsenlaifde, begoan mit aal dat om ons tou is. Netuur, daaiern. Vrede in d’wereld en vree in t haart. Zörgzoam veur mekoar. Nooit meer oorlog en geweld. Ast wat hest en n aander nait, den dailst.
k Zit op stroade in De Koog. Veur n bakkerswinkel. Hippies hangen lammenoadeg om mie tou. Laange kralenkettens om. Aine holdt mie n haalve stoet veur. Is t bedoulen dat k der n hap uut neem? k Glimlaag en schud langzoam van nee. n Glimlaag weerom. Aaltied sloom glimlagen. Hoaren tou aan d’kont. Wiede flotterpolten in bonde kleuren. Blode stroatvoelvouten. Gezichten aaskebakkengraauw. k Bin n noamoakhippie. Haile mirreg heb k op straand touholden. Lezen en zuiken. n Rooie zunnekleur van zee. Broenverbraande aarms. k Heur der nait echt bie. Mist wat.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

5 × 4 =

Terug naar boven ↑
  • Literatuur activiteiten

    Geen nieuwe activiteiten