Column Jan de Jong, column

Gepubliceerd op 24 oktober 2015 | door Webloug

0

‘Goud ontholden’ column van Jan de Jong

Goud ontholden

Pèts. De eerste wats aan d’oren haar k al te pakken.
‘Bist n dikke dreumerd. Woar hest t braifke loaten. En woar binnen sinten.’ Moeke staait braidoet en veegt handen aan schoet òf.
Ik grabbelde ien buus om. Verdold. Onder buusdouk. Oet n sleetse buus doar al rillen overdwaars deur t stof lopen pulk ik n verfrummeld pepierke. “Haalf pond gehakt haalf om haalf” lees k haardop.
Pèts. ‘Weerom doe, rad. Ik stoa der op te wachten.’
Ik begriep ter niks van. Onderwegens noar slagter heb k t aal haardop zegd.

Noadat elk aan beurt west was wus k het nait meer. Mor k haar ja n braifke. Vot was e.
Moeke zee veurtied nog: ‘Hier n braifke doe dikke dreumerd. Ik kin die al laanger as vandoag. Knipke goud opbaargen en nait verlaizen. En deurlopen. Votdoadelk weerkommen.’
Mit twij glìnne oren aan kop gong t weerom.

Kiek, vandoag de dag zel dij kwoajongen dat nait overkommen. Gain pètsen aan oren, nait meer verantwoord. Doarnoast hebben zai n mobieltje. Doar lopen zai ja hail dag mit ien haand. Bellen, meziek luustern, braifkes versturen en nkander negeren. En ien dij tillefoon kinnen ie gewoon joen bosschoppen toetsen.
Niks vergeten, din denk ter om dat zai heur tillefoon nait verlaizen. Gain denken aan. Man, wat mout ie din ien t leven wel nait begunnen.

Mor nou eefkes wat aans. “Slaap haalt vergeten informatie weer boven in brein” lees k op t internet.
Kiek, dat haar k haitied al docht. Even n sloapke en din binnen ie vernijs vris.
Oet n studie bliekt dat as ie wat vergeten binnen, dat noa n sloapke noar boven dreven is. Ie waiten het din inainen weer. Wel honderdendrijentwinneg minsken mozzen stoere woordjes leren. Noa overheuren wuzzen zai n baarg nait. En noa n nachtje sloapen was t kloar.

k Mout vanmirreg nog om bosschop. Ik pak tillefoon en toets ien, n stukje roggebrood en n gesneden broen. k Zet geliek alarm op drij uur. Makkelk.

Dreumerd nuzzelt hom mooi nog eefkes laankoet op baank.
En wedden as dat k wakker wor dat k wait woar of t tillefoontje ligt?

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

zestien + 7 =

Terug naar boven ↑
  • Literatuur activiteiten

    Geen nieuwe activiteiten