Column Tonko Ufkes, column, goed lek

Gepubliceerd op 31 januari 2015 | door Webloug

0

‘Goed lek’ column van Tonko Ufkes

Dit waas ien gien joaren gebeurd, misschien noa de eigen studentetied niet meer: Wij warren as eersten kommen en toen wij ok as eersten weer vot wolden, ston n hiele bult roestege fietsen tegen die van ons aan. Mor ze warren wel van vrienden van ons dochter, dat mien vraauw en ik begonnen ze stuk veur stuk te verzetten.

Deur al die eerstejoarsstudenten die de propedeuse van ons oldste dochter vieren kwammen, vuulden wij ons ieneent weer jong. En wat harren ok wij rondreden op piepende fietsen, zunder licht en bel. Ach, toen wij studeerden beston nog gien OV-joarkoart, mobieltje of E-mail en dus reden we om n verslag te bespreken gewoon even hin en weerom van e Goeman Borgesiusloan noar n studenteflat ien Selwerd. Bij elke fiets die we versleepten kwam wel n staark verhoal boven over lange òfstanden, snijstörms en lekke banden.

‘Zeg, wiest nog van ons eigen propedeusefeest en dat gedoe met dien fiets?’ begon ik n voak oproakeld verhoal over hoe we nkander veur t eerst trovven. Mien vraauw gaf gien antwoord en dus vertelde ik weer es over t feest ien Huize Maas, woar k bij t votgoan deur heur aansproken wer omdat ze n lekke veurbaand har. En hoe we soamen op mien fiets, met heurent an e haand, deur de stromende regen hielendal van e Vismarkt noar heur flat an e Aquamarijnstroat reden. En dat we zo kold warren dat zij besloot soamen waarm te doesen en dat t nou al weer 35 joar leden waas dat we nkander veur t eerst zaggen.

Nou lachte mien vraauw me toe, ienderdoad as 35 joar leden en vertelde dat zij zulf t ventiel lösdraaid har toen ze mij ien die feestzoal zag: ‘Doarnoa heb k gewoon goed oplet en geliek toenstoe votgingst ben k ok noar boeten goan en ja, ieneent ston mien veurbaand leeg en har k n goeie reden om dij aan te spreken.’

Haand dien haand ben k met mien nog altied deurtastende vraauw op huus aan fietst.

 

(Foto © Jan Glas)

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 + 11 =

Terug naar boven ↑
  • Literatuur activiteiten

    Geen nieuwe activiteiten