Column Chris Kiel, column

Gepubliceerd op 5 februari 2015 | door Webloug

0

‘Giro’ column van Chris Kiel

t Begon dunderdag mit n foto in kraante, n klaain briltje, paginavullend hoar. Mode zeker.

n Bekend gezichte: wol dizze man mie zeuven joar leden nait veurschrieven welke 500 gedichten oet de wereldliteratuur ik beslist lezen mos, en dou k, volgzoam, zien bouk kocht har, peperd’e mie dou nait in dat ik Adriaan Roland Holst toch echt vergeten mos, as ik deur hom en ander moderne (modieuze?) mensen veur vol aanzain worden wol.

As k mie goud herinner (mor misschien leg k – deur n klaain geheugen en n dikke verbeelden – n schoakeltje te veul) von e ook sonnetten as Middelbaar onderwijs van Driek van Wissen mor oftands geriemel en mos dij dus gain Dichter des Vaderlands worden.

En dou, inains, links onder t monsterpetret: 4-4-3-3. En doaronder Giro giro tondo.

Poëziegeschenk 2015.

n Sonnettencyclus. n Echte, ston in kraante.

Was ik nou gek worden? Dee mien verbeelden n rondedans? Van Petrarca, Boccacio, Dante, sonare, sonnet, tuiterd, Bredero en Hooft? En noa goud twijhonderd joar, Perk (‘..sonnetten, gij kind’ren van de rustige gedachte’ – nou, n rustege gedachte trof ik gelukkeg naargens aan in Giro. ..) en Kloos en nog es honderd joar loater: Van Wissen, Rawie en in Krödde Jurrie Bosker. Bieveurbeeld.

n Hap en n snap oet dij vattien regels en ik was verkocht: dit was de gekte van Marsmans Paradise regained en Engelmans Vera Janacopoulos, mor den in sonnetvörm.

Dinsdag mos mien vraauw ook noar Stad. Gezelleg, mit zien baaident boodschappen doun. ‘Woar trevven we mekoar noa t winkeln?’

In aal boukhandels was t bundeltje al votgeven, en hou voaker ik bot vong, hou haarder ik luip, giro…

En, wat nooit gebeurt, vraauw zat wied veur mie te theedrinken en mobielde woar k bleef.

In Beem was nog n boukwinkel. Har nait mitdoan.

Beld noar Oethoezen en Winsum. Ook niks.

Haren den. Doar is t wel voaker telefoonfeest, ja. En weer! ..tondo.

k Bin vot weer in auto sprongen. Drij ketaaier loater was k vieftien sonnetten van Ilja Leonard Pfeijffer rieker. Alles is hom vergeven.

Antjie Kroch heb k der bie kocht. Moderner.

 

(Foto © Jan Glas)

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

8 − 3 =

Terug naar boven ↑
  • Literatuur activiteiten

    Geen nieuwe activiteiten