Column Tonko Ufkes, column, goed lek

Gepubliceerd op 27 januari 2016 | door Webloug

0

‘Gezond eten’ column van Tonko Ufkes

Gezond eten

‘Nee Tonko, swaarte kovvie en ok die appeltoart is slim ongezond, gewoon volkorenstoet, soamen met gruunte en fruit, dat is veul beter. Zulf kin ik t doar de hiele dag wel met doen’ en ongevroagd krieg ik n opensloagen tromke onder ogen: n duuster plak stoet en opzied lijt n tomaat met partjes appel.
‘Moest steveg eten, niet hieltied lutje dinkjes.’ Rieneke zet heur tromke eefkes veur ons op toavel mor pakt het ding meteen weer op schoot en nemt het broene stuk stoet tussen doem en wiesvinger, holdt dat veur mien gezicht en lijt het terug. n Mement viel t zunlicht van boeten der op en zag ik wat bewegen, al twievel ik nou weer. Eileks zol Rieneke t zulf bekieken moeten, t liefst vlak veur t roam en niet an dizze kaant van e kovviekoamer.
‘n Bult schrievers drinken swaarte kovvie of nog staarker spul; wien, jenever of zukswat, mor t is slecht veur de moag en dan die vreseleke appeltoart! Veuls te veul sukker en wij schrievers zitten al zo’n nust stil, nee Tonko, moest gezond eten en drinken, dus nem ik altied alles zulf met, zigst wel.’ Of t zo weden moet, vannijs pakt Rieneke heur stoet uut t tromke en zwaait dat deur de lucht. Gelukkeg waas k doar op verdocht en nou zie ik het duudlek.
‘Rieneke, volgens mij . . . ‘
‘Dan doe k beveurbeeld sloa of tomaat der bij tussen’ onderbrekt ze, ‘dan blift het lekker vers. Niet van die rommel uut e winkel, nee, uut eigen tuun. Onbespoten, wat dochst!’ Ien n flits drukt ze vlak veur mien gezicht beide plakken uutnkander: n tel kieken we mekoar aan, het slakje en ik, dan wordt het stoet weer ien t tromke stopt.
’Rieneke!’
‘Ja, hest geliek, we moeten gaauw noar boven, de schriefgroep wacht misschien al. Deur ons gesprek ben k der gieneens an toe kommen om . . .’
En ien één bewegeng dut ze n greep uut heur tromke en hapt toe.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier + 15 =

Terug naar boven ↑
  • Literatuur activiteiten

    Geen nieuwe activiteiten