Algemeen Gerhard Jansema

Gepubliceerd op 26 juni 2018 | door Jan Glas

0

Gerhard Jansema levert n Ploeg-laid veur Martini’s carillion

De heer Gerhard Jansema schreef veur t 100-joarege kunstenoarscollectief t laid ‘De ploeg en de gouwen’. De haile zummer zel t laid te heuren wezen op t carrillon van Martinitoren ien Stad. Hopen dat t laid vanòf onze Olle Grieze aan n zegetocht deur Stad en Ommelaand begunt!

Hou t apmoal zo kommen is vertelt Gerhard Jansema hieronder:

‘2018. 100 Joar kunstkring De Ploeg. Leek mie aanlaaiden veur n laid, ien t Grunnegs vanzulf: ‘De Ploeg in de gouwen’. ‘Gouwen’ zeeën ze vrouger tegen pervinzielaandstreken. t Hogelaand was in gunst van de kunstschilders van dij tied. ‘Rood kleurt Fivelingo’, docht ik om reden dat k overainkomst zag mit de kleuren van de Ommelaander vlag oet 1579 rood, wit, blaauw van Fivelingo, Hunsingo en Westerkwartier. In 1947 is wit/gruin van Stad der bie vaarfd en is t de pervinzievoandel van nou.
De peletvrunden van t Blaauwbörgje wazzen ja geern mit kleuren op douk aan loop. Mor bie De Ploeg heurde ook groafische (druk-)kunst (o.a. Werkman) en… meziek (Ruyneman). Doarom belde ik mit ‘Stichting Martini Beiaard’ in Stad. Beiaardier De Boer was slim wies mit t wieske en het t dou mit klokkegaiter Simon Laudy van Klokkegaiterij Reiderland uut Finterwòl op de speultrommel van de carillon zet. Dat nuimen zai ‘versteken’.
Vanòf haalf maai en haile zummer deur op elk haalf uur én kertaaier veur Elk hail uur is t in Stad te heuren.
Noast t carillon ston de speultrommel woarop de beiaardier elk kwartoal aandere meziekfragmenten zet. Elk en ain ken n verzuik indainen veur n meziekstuk. In mien gevaal gong t om n fonkelnoagelnij laid. t Komt hoast noeit veur dat stichten dat aanboden krigt begreep ik. Doarom staait t ook op de droadkringloop van ‘Stichting Martini Beiaard’. Onder t linkje ‘Diversen’ staait de tekst van ‘De Ploeg in de gouwen’ mit infermoazie over
mien tekstzuiktocht. En wel mitzingen wil… groag, loat joe heuren.’

De Ploeg in de gouwen(©Gerhard P.J. Jansema)

(Couplet 1)

Daipblaauwe lucht, pervinzie vlag
De Ploeg brocht kleur rondom Stad
Aargens in t gruin, ston bie t Raitdaip,
t Blaauwbörgje, vaarf was doar zat
Sums n aqua-rel, plons! en t stel,
dreef op de ezel noar t Wad…

(Refrein)

Rood kleurt Fivelingo
Wit glaanst in Hunsingo
Blaauw siert t Westerkwartier
en t Gruin…., heurt ja bie Stad

(Couplet 2)

Kleima en Hansen, handege Job,
muiken Warffum’s Rieksmonument
Werkman muik geern, ‘druksels’ veur elk
en t Gilde kreeg n Kopperprent
Grunnen op pertret, mengd op t pelet,
doar wer De Ploeg mit bekend

Rood kleurt enz.

(Interm.)

Schilders sjouwen geern deur klaai en deur zaand
omliesten de gouwen van t Grunneger laand

Rood kleurt enz.

Tekst/melodie Gerhard P.J. Jansema, Hoogezand, 14/02/2018 Wett.ged.

Tags: , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

13 − negen =

Terug naar boven ↑