Muziek ger warink

Gepubliceerd op 18 maart 2015 | door Jan Glas

0

Ger Warink woensdag in Twij Deuntjes

Henk Scholte proat mit Ger Warink n muzikoale doezendpoot dij aaltied te porren is veur n goie stek. Hai komt woensdagoavend bie ons laangs en let ons op zien puurst n noagelnij laidje over de stroaten van zien jeugd heuren..

Beverwijk

Ger van ‘Hail Gewoon’, ‘Outtakes’ en alerhaande aander combinoatsies is allaank gain onbekìnde meer in onze Grunneger meziekwereld. Van zien komòf is e n Beverwiekster, doar het e zien eerste jeugdjoaren touholden.

De Beatles en de Stones

Zien ollu haren n hotel mit feestzoal, doar aaltied op muzikoal gebied wel wat loos was. t Was de tied van de Beatles en de Rolling Stones. Beverwiek en noaste kontraainen was toudestieds al n stee mit hail veul bandjes zo as de Bintangs, Ekseption, Oscar Benton en goa zo mor deur. De bandjes gruiden doar in de joaren zesteg zotrekend as paddestoulen tou de grond uut. Veul van dij Beverpop-muzikanten waren bie heur in t hotel kind aan huus.

Stratocaster

t Kon din ook nait uutblieven, dat Ger al hail vroug de slinger aan de meziek har. Zien eerste was n echte stratocaster en dij het e noar aigen zeggen veuls te snel votdoan. Hai stapde over op n Egmond, n elektrische gitaar van aigen bodem, dij tegenwoordeg n cult-stoatus het. Vandoag de dag kin e kaizen uut n aigen winkel vol gitaren.

Hotel Spoorzicht

Deur n grode hotelbraand mozzen ze op zuik noar wat aans en dou tipte n vertegenwoordeger heur op Hotel Spoorzicht in Loppersum. Dat leek heur wel wat tou en zo binnen Warinks zienent van d’aine dag op d’aander op t Hogelaand terechde kommen. Dat was veur Ger in t begun wel even slikken, want Lopsters waren in omgang hail wat aans as Beverwieksters. Hai har t al vot aan stok mit d’ Hogelaandster toal dij e mit zien achtergrond hailendaal nait machteg was. Noar aigen zeggen: mos e zuk de Grunneger toal as jonkje uut t Westen zo gaauw meugelk aigen moaken, want aans heurst der ja hailn’t bie. Hai is bie zetten letterliek t gevecht aangoan en het zo t Grunnegs leren mouten.

Lopster mit de Lopsters

Ger is van laiverlee min of meer n Lopster mit de Lopsters worden. Wat in Beverwiek begon kon in de zoal van hotel Spoorzicht ook. Verschaaiden renommeerde bands traden doar in t weekend op. De Grunneger band Solution nam zulfs in heur zoal toudestieds nog n ploade op. Mit zo’n nust goie meziek om hom tou, kon t ook nait uutblieven om zulf as muzikant aan de bak te goan en dat is mor goud ook!

Bekiek HIER de speulliest.

Tags: ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

acht + 12 =

Terug naar boven ↑
  • Muziek activiteiten

    Geen nieuwe activiteiten