Gepubliceerd op 14 augustus 2017 | door Jan Glas

Gedicht van de Week van Renko Sipkes

Noa holdert aarbaiden op aigen grond

Doags sjeest e
en peest e
op boer zien grond,
nou lòpt e en kropt e
op aigen rond.

Hai schovvelt
en knovvelt
zuk dik in ’t zwait,
mor oetschaiden dut e
nog lange nait.

Nog twij rieg,
nog ain rieg,
hai komt d’r deur,
ze mouten d’r in, want
’t is tied d’r veur.

Din rekt e
en strekt e
zien rug es oet,
en schopt mit zien klomp noar
n rulle kloet.

Nou stait e
en gait e
stoareg noar hoes
en kraabt zien klompen
òf achterthoes.

Zo deden
tevreden
zien veurzoaten ’t ook…
de dag gait onder
in damp en dook…

Renko Sipkes (ps. van E. Scheltens, Meedhuizen 1919-2006) Bron onbekend.

Tags: Cursus Gronings, gedicht, Gedicht van de Week, Grunnegs, Renko Sipkes