Gepubliceerd op 13 juni 2016 | door Jan Glas
Gedicht van de Week van Kees Diemer
Dat olle Knoal
dat knoal van vrouger – t knoal mit t joagerspad
vol schepen mit soms van dij vrömde noamen
mit snikke uut stad, mit pladde bagelproamen
dat olle knoal woar zo’n bedrieveghaid in zat
mit n zunne in t wotter as n golden bale
en ekkelbomen nuver in t gelid
mit waske obbe blaike kroakend wit
en dikke bozzen bloumen op daipswale –
dat knoal staarft langzoam of: ik ston der lèst
op n holten badde dij al nooit meer draait
en dou heb ik t op ainmoal goud begrepen
dat knoal doar is de strödde dicht van knepen
dus t is wel dudelk hou dat verder gait:
het rochelt nog wat noa en t het der wèst
Kees Diemer (Musselkanaal, 1914 – Rotterdam, 1995)
Uit: Krödde nr. 30.
Gerelateerde berichten
Winnend Gedicht van de Week van Rens Komduur-Van der Molen →
Gedicht van de Week van Eldert Ameling →
