Gedicht van de Week van Johan A. Leopold

’t Is hārst

Ons aibernust stait doar verloaten,
Gain zwālfke schut meer ons verbi;
Het lānd is zoo koal, en de diezige locht
Ligt zwoar over ’t vēld en op mi.

Heur, hou de wind waait,
Kiek, hou hai de bloaren zaait,
Hou ze wārlen en dwārlen.
En deurmekoar schārlen,
As lutje kinder op ’t bāl.
’t Is hārst.

En wied heer over ’t vēld komt ‘e buldrend ānzoezen,
Om met duvelsch geweld deur de takken te broezen,
Dat ze zwaaien en zwiepen. Hēn en weer,
En jammerliek piepen
Ieder keer.

Dei boome, dei stārke,
Op zied van de kārke,
Hij rekt zuk
En wringt zuk,
De kreunende, steunende stam.
Zwaait wild gierend zien noakende ārmen
En schreiwt in zien karmen:
Erbārmen,
Erbārmen!

Hier, hier mien kinder, Mien bloaren, mien leeb’n;
‘k Wil āllens, ‘k wil āllens di geeb’n;
O loat mi, o loat mi mien kinder!
Mien kinder!
Heur, hou gunds ’t woater broest
Dat ’t schoem over de zeediek goest.
’t Is of ’t onder de golven grommelt,
Wied weg in de Dollert rommelt – –
Da’s störm!

En as ‘e hier tusken de hoezen deurgait
Zingt hoelend en gierend de störmwind zien laid:
Hier ben ik. Hier bin ik;
D’ Noordwester komt weer.
De zömmer verjoag ik,
De landen dei ploag ik,
Mien wolken binn’ boas en de zunne nait meer.

Bārsten zel ālles, wat veur mi nait wil boegen.
Wil doar dei aik nait omdoal mit de kop?
Bok di! – Doe wist nait? – Rakker, doal, zēg’k di!
Krak den, veur mien part; zai, zoo ligste goud.

Heere God, wat was dat? –
Niks, – ’t was de gangdeur, dei klapte;
De maid hār vergeten te grondlen.
‘Trientje, goa mi nait mit dei toetlampe noar achteren,
Gaist’ noar d’kougāng, neem ’t schienvat den mit!’
Nog zit mie de schrik in de bainen,
God, as der ies brānd kwam…..!

Ons schure is vol: het is hārst.

Joh. A. Leopold (Groningen, 1846-1922).
uit: L. Leopold en Joh. A. Leopold, Van de Schelde tot de Weichsel. Deel 2 (1882)

Elke week wordt der n gedicht kozen oet 200 joar Grunneger poëzie. Touglieks zel dit gedicht publiceerd worden ien t Dagblad van het Noorden, dinsdags op de pagina Grunnegs Goud.

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negen − 7 =

Terug naar boven ↑
  • Literatuur activiteiten

    Geen nieuwe activiteiten