Gepubliceerd op 10 september 2018 | door Jan Glas
Gedicht van de Week van Jan Sleeboom
Stilleven
wat riepe vruchten op n stainen schoal,
dij gluien nog noa van zummerzunnedoagen
mit daipe blözzen as van rode wien
in teer kristal op old en blank damast.
septemberappels, peren, hönneggeel.
de dikke trös van daauwbesloagen droeven
mit zachte glanzen op heur strakke vel
van noajoarslicht, dat aan de smale roamen
verlegen staarft.
Jan Sleeboom (Delfzijl 1917 – Tilburg 1963)
Uit: Dörp en Stad, 1960
Gerelateerde berichten
Gedicht van de Week van Geert Teis →
Dik Pomp weke 46 te gast in Toezeboudel →
