Gepubliceerd op 27 maart 2017 | door Jan Glas

Gedicht van de Week van Gré van der Veen

moeke

moeke ropt op boodschap
k buul der stiekom uut
knikkerpuut in haand

strompelnd vaal k op t gras

moekes rode haand
kroes
van achter wasketobbe
tilt mie zo mor op
zet mie zacht op vouten

k dou t nait weer

zel mie nij doun
veur mie aan noar huus

ze tovvelt kiepeg vot
haand
in d’schoetbuutse

ik bozzel heur veurbie
en
kiek mor nait meer om

Gré van der Veen (Veendam 1936)
Uit: Krödde nr. 61, 1997

Tags: Gedicht van de Week, Gré van der Veen, moeke