Gepubliceerd op 12 april 2016 | door Jan Glas
Gedicht van de Week van Annie van Dijken-Hooghuis
Oavend achter diek
Aal stoaregaan wordt t oavend achter diek.
Maank kleurde strepen, sangen, rood en geel,
glidt zun ien t wodderber, zai legt heur deel
en gaait aan t sloapen, ien Neptunes’ riek.
t Spoukuur slagt en wait nait van verwiek.
Din schriwt n oel, hou hol k miezulf ien t zeel?
Aal stoaregaan wordt t oavend achter diek.
Der voart n boot, n Vikinger geliek,
n dodenschip, n woazeg ritueel
oet laankmanstied, heur, kloagende meziek,
noar overkaant en aangst gript mie bie keel.
Verhilderd stroekel ik bie hoogte deel,
ien graauwens, t is aal oavend achter diek.
Annie van Dijken-Hooghuis (Bedum, 1942)
Uit Krödde nr 69, 1999
Gerelateerde berichten
Winnend Gedicht van de Week van Rens Komduur-Van der Molen →
Gedicht van de Week van Eldert Ameling →
