Gepubliceerd op 5 september 2016 | door Jan Glas
Gedicht van de Week van Aly Freije
Amazone
t Heersen bevaalt mie
tussen veur- en achterhaand
de inholden erotiek van n vorstin
dij mit heur knot onder n herenhoud
hoog aanspannen borsten
veerdeg van haand heur peerd aanstuurt
mor ook de ziedeglaans op kastanjehoed
het trekken van t vel bie t aaien
k wil zunder zoadel mit heur hiervandoan
op peerderuggen over prairies joagen
opwaaiend hoar mit veren tugen
en as peerden dansen
bieten in mekoars moanen
de achterbainen de lucht in gooien
veurbainen klimmend mekoar omhelzen
kus ik de zaachte lippen
van mien landoadelamazone
Aly Freije (Veelerveen, 1944)
Uit: Dast doe dat ik (Huis van de Groninger Cultuur, 2015)
Gerelateerde berichten
Winnend Gedicht van de Week van Rens Komduur-Van der Molen →
Gedicht van de Week van Eldert Ameling →
