Column Harry Niehof, column

Gepubliceerd op 17 februari 2016 | door Webloug

0

‘Gas!’ column van Harry Niehof

Gas!

22 juli 1959, bam, eerdgas vonden bie boer Boon, Kolham. Zang en daans, slingers, groot feest? Niks dervan, want over n poar joar zol hail Nederland op kernenergie stoken, dus de NAM was al gaauw blied dat ze dat minne gas veur n prik aan Itoalië verpatsen konden. Loater, dou bleek dat t gas toch wel degelk veul geld opbròcht, zatten ze deraan vast en laagde Itoalië ien zien voestje.
En boer Boon, wer dij der riek van? Hailemoal nait, want ien 1810 was der al n mienwet van kracht worden, woarien ston dat elke bodemvondst aigendom van stoat wer. Boer Boon vond t eerst wel griezelg, zo’n gasboring vlak bie zien schuur, mit aal dij gevoaren en zo, mor al gaauw was der n sfeer van vertraauwen. Voak kwammen ze bie hom om wodder oet put te hoalen of n leddertje te lainen. En aiglieks haar e t hail best veur mekoar, von e, want ze konden snaachts tot ain uur deurwaarken bie t licht van gasvlam. ‘Je konden der wel n kraant bie lezen.’
n Poar joar loater, in ’63, ’64, kreeg elkenain den toch eerdgas. Het haile dörp lag overhoop, en op houk van Delweg en Heerestroat, op puunhopen van Café Niehof, haar de Hanab ale buizen hènlegd dij deur t dörp kommen zollen. Gain gedou meer mit kolenkitten, gain gesjaauw meer mit butagas. Pa was der blied mit ien zien nije bakkerij, want oven aanmoaken mit törf en stoken op briketten, dat was hail wat meer waark as gaskroan opendraaien.
Mor ien 1972 waren der nog aaid veul mensen boeten dörpen dij gain eerdgas haren. Ze zaten zo’n beetje mit kont boven op gasbel, mor buizen werden der nait legd, want ze waren ‘onrendabel gebied’. Man, ze konden dat gas hoast onder heur eerappels liggen zain. Voak hadden ze traauwens ook gain wodderlaaiden – wodder kwam oet put – en mozzen ze licht moaken mit petrolielampen, want der was ook gain stroom.
Van Wolde haar n boerderij bie Westerwijtwerd, hai mos n sleuf van 80 meter zulf groaven, den wol de NAM der wel n buis ien leggen. Aander boeren laiten aarbaiders sleuven groaven. Dizze aarbaiders haren ervoaring, want ze haren voak ook al drainoagesystemen aanlegd en doar sleuven veur groaven. Swoar waark, ze verdainden ook maistied beter as aander boerenarbaaiders.
Der waren vanzulf ook mensen dij gain gas hebben wollen. Veuls te gevoarlek, aal dij explosieve laaidings deur t haile hoes hèn! Ien dat geval wer gaslaaiden tot aan boetenmuur van t hoes legd. En sömmege boeren werden kwoad as gaslaaiden deur heur laand legd wer, vanwege schoade aan t gewas.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

5 + twintig =

Terug naar boven ↑
  • Literatuur activiteiten

    Geen nieuwe activiteiten