Column Jan de Jong, column

Gepubliceerd op 26 november 2015 | door Webloug

1

‘Even oet eerns’ column van Jan de Jong

Even oet eerns

Doar hest heur. Ik krieg t ter waarm van. Groot en duuster komt zai op mie òf. Ik lig as n plaank. Heur handen goan kaalm noar mien haals.
Oam wordt mie langsoam ofsneden. Ik koggel en wil om mie tou haauwen. Aarms zitten vaast.

‘Hé, dou ais rusteg!’
Ik duur ogen nait lös doun en tril over t haile lief.
Vraauw zit op knijen ien bèr en holdt mie stief bie aarms. ‘Wat hest wel nait ommaans!’
‘n Spouk,’ fluuster k.
t Is even hail stil. Din schoddert zai t oet en is nait te bedoaren.

Dat was maal wakker worden. Vraauw lopt hail dag te gnivveln en no en din te laggen.
Ik bin der nait gerust op. Aan t ènde van mirreg kroep k achter laptop.

n Gaist is ain dij oet tied kommen is en no ien hemel zit. Hai is noar t licht overgoan en kin hinneweer raaizen.
n Spouk is nait noar t licht overgoan en wait nait goud dat e oet tied kommen is. Hai is nogal ais ien toeze en t pad kwiet.
En hemel is nait boven ons. Dat is nait woar. Hemel is hier gewoon bie ons op aigenste stee. Wie kinnen dat allinneg nait zain.
Spouken en gaisten kinnen ons wel haitied zain. Deur heur lichtenergie kinnen zai ien tied en roemte raaizen.
Kiender binnen voak hooggevuileg en kinnen heur makkelker zain.
En no komt t, spouken holden van kovvie. Onderzuik het n verband aanteund tusken kovvie drinken en spouken zain. Ie himmen drij moal zoveul kaans op stemmen heuren of spouken zain as ie doags om en bie zeuven kopvol kovvie drinken.
n Spouk votjoagen kin ook. Saliestokjes ien braand steken, din deur t hail hoes lopen en spouk vroagen of e votgoan wil. Ook n goudkope menaaier is gebeden bruken of t hoes onder zolt streuen.
Volgens paranormoale onderzuikers binnen t kwoadoardege spouken en gaisten dij ons ien sloap ploagen.

Ik klap laptop dicht en kiek vraauw aan. ‘Ik mout nait zo veul kovvie meer hebben. Zeker oavends nait.’
Vraauw knist. ‘Loat mie roaden.’

Tags: , ,



One Response to ‘Even oet eerns’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

14 − 3 =

Terug naar boven ↑
  • Literatuur activiteiten

    Geen nieuwe activiteiten