Column Fieke Gosselaar, column

Gepubliceerd op 5 juli 2016 | door Webloug

0

‘En mor deurgruien’ column van Fieke Gosselaar

En mor deurgruien

Nou ik steeds dikker wor, heur ik steeds voaker hou goud ik der wel nait oetzug. Veul voaker as dou ik nog gain dik lief haar. Op trappe as ik noar kantine loop heur ik: ‘Zugst der goud oet.’ As ik n bekende tegenkom dij mie al laank nait zain het: ‘Zugst der goud oet.’ As ik op n BBQ n onbekende zai dij noar mien lief kikt, vroagt hou laank ik nog mot en den zegt: ‘Zugst der goud oet.’ t Is net ook dij onbekende dij bie t weggoan even prebaaiert mien lief aan te roaken. Ik haar al heurd dat n lief mit baby n soort aantrekkingskracht het om vluchteg aan te roaken, veural bie mannen, mot ik doarbie opmaarken. t Schient aarger te worden as ik nog dikker bin. n Vraauw vertelde mie dat ze t dikke lief van n onbekende man doarnoa ook vluchteg aaid haar en dat hai heur verboasd aankeken haar. ‘Wat dust nou?’ Mor ja, t is ook gewoon ons lief.
‘Hou is t?’ vroagt collega in riege van kantine.
‘Goud, ik grui.’
Noadat ik mien stoetje in zunne opeten heb, stoa ik bie hom in lift noar boven. ‘Hou is t?’ vroagt hai weer. Ik denk dat hai even niks aans wos om te vroagen. ‘Goud,’ zeg ik. ‘Mien stoetje smuik mie goud.’ Hai kikt noar mien lief. ‘Hou laank most nog?’ en wiest, roakt mien lief net nait aan.
‘Tot aan mien bevallen?’ vroag ik.
‘Hou laank dast nog waarken most,’ zegt hai.
‘Tot acht augustus.’
‘Oh, den most nog wel even.’
Dat heur ik ook voaker. ‘Oh, den most nog wel even.’ Ik bin benijd wanneer dat omdraaien zol noar: ‘Oh, dat is nog mor even!’ Ik heb nou nog zoveul te doun dat bie mie t ende nog nait in zicht is. Mien lief het dat òf en tou wel. Aan t ende van de dag het t lief t wel had en wait ik nait goud meer hou ik zitten mot. Den vuil ik mie nait zo goud as dat ik der oet zug. Den is t wel mooi dat zoveul minsen t nog even zeggen, misschain dat ze t doarom doun.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

een × 4 =

Terug naar boven ↑
  • Literatuur activiteiten

    Geen nieuwe activiteiten