Column Jan de Jong, column

Gepubliceerd op 26 januari 2017 | door Jan Glas

0

‘En dou…’ column van Jan de Jong

En dou…

Ik geef elk n haand. Wichter van tehoes swiegen. Goan wenkbraauwen omhoog. Grode ogen kieken nkander aan.
Stagiaires begriep ik.
As k n stoul krieg holdt ain mien aarm vaast. ‘Bent u van de dagopvang?’
Stilte van kieken dut mie stief sloeken. Ik? Woorden binnen even op.
‘Of bewoner!’
Houndervel lopt mie over rug. ‘Vrijwilleger.’ Ik stöttje.

Sjoelcompetitie veur mìnsen mit dementie.
Dat is goud veur heur. Bewegen. Heb k lezen ien braif, dou zai mie vrougen.

Boomloze ogen.
n Vraauw speert, krigt brikken veur t schotje van sjoelbak vot en legt heur der achter. n Man schoft zien toesterg hoar aan zied en n nije brik hinneweer. Haalverwege blift e liggen. Vraauw gript hom en legt hom achter t schot. Hai krigt vernijs ain van t plankje. Kikt noar zien handen en noar ons. Krigt nog ain en kikt rond. Dut scholders n moal of wat omhoog en lopt vot. Baaide aarms veur hom oet.
n Aander vraauw bèlkt, ien n vremde toal en pakt hom brikken òf.
Ain geft mie kovvie.
Gat en bainen willen nait van stee. Diezeg stoar k ien t kopke. En snoef.

Weerom, dat jonkje bie t mirregeten.
Moeke zette leste paan op toavel. Hai haar nog haalf ien t achterhoes legen, wis buurvraauw. Mit schop nog ien handen. Noast hom n omvalen körf mit haalf ponds pakken kovvie. Lang nait wies.
Ien toen wazzen overaal pakken kovvie begroaven haar zai heurd. Toen haar vol legen.
Aal doag kwam e veur kovvie, haar ain van winkel zegd. Aal doag. Kins noagoan.
Elk was baang veur hom. Zo’n vremde oetkiek. Niks zeggen.
En kwam gain mìnsk over vlouer zeden zai bie bakker. Al joaren nait. n Male kerel. Dik tachteg was e worden.
Postloper kreeg aal doag n segoar, veur onder pet. En altied mos e t petret van zien vraauw zain. Din schraiwde man. En laip postloper gaauw der oet. Wat mout je mit zukkent. Noar Zuudloaren. Opbaargen. Pa wis t wel.
Ik sweeg en haar buusdouk kregen. Kiender zollen nait proaten onder t eten. En was niks om te janken.

Vernijs n dag, dat t eten nait smoaken zel.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 × vier =

Terug naar boven ↑
  • Literatuur activiteiten

    Geen nieuwe activiteiten