Column Jan de Jong, column

Gepubliceerd op 20 april 2015 | door Webloug

0

‘En din…’ column van Jan de Jong

En din…

t Infuus zit. Eerst n puut drupkes veur t mizzelk worden.

Chemokoamer ien t zaikenhoes.

Even over negen.

t Aanbegun van vattien doag chemo. Lèste.

t Is blokjesbloezendag.

n Laange, oldere man noast mie het n voale mit aarnswoar graauwblaauw aan. Man noast hom klaaine, duustere blokjes mit raandjes geel. Doar weer noast n man mit n spiekerjaske en n blaauwblokte bloes. Ik kiek eefkes noar mien aigen. n Roodbroen blokte.

Man mie tegenover hangt laankoet ien n spanse koiboibloes ien zien relaxstoul. Ales aan hom is kört en rond. n Vrundelk gezicht van ain en aal goudeghaid. Ik denk eefkes aan dat manneke mit dij witte autobanden om t lief.

Zien vraauw noast hom langt aalgedureg wat aan te bikseln as e ogen lös dut.

Proaten is e verleerd. Vraauw geft hom zien fruithapje. t Smoakt. Hai prikt boudel rad noar binnen. Din schoerelt e hom nog ais goud ien stoul, dut ogen dicht, volt handen op t lief en begunt doemen te draaien. Drij veuroet drij achteroet. Drij veuroet drij achteroet.

Aal oavends kroop zai stoef noast kaggel. Ien heur duster. Ain bain over d’aander. n Vout dij aal op en dail wupte. En mor doemen draaien. Drij veuroet drij achteroet. Toerloos.

As vroren zat k achter aan toavel der nait te weden.

Steevaast haalf aacht kwam zai ien t inne. Gerommel ien keuken mit deuskes, vleskes, strips en n kroan dij eefkes luip. n Beker op t aanrecht. Vernijs wer t stee noast kaggel opzögd.

Aacht uur. Tebletjes deden heur waark. Stovvelg wer t pad noar boven zögd.

t Licht boven toavel en radio kon aan. Arendsoog en Witte Veder haren geduldeg wacht.

Drupkes zuiken mit geweld heur pad. Lezen en schrieven wil nait. Klok is nait veuroet te branden.

Haalf vaaier kommen vraauw en klaaindochter mie hoalen. Opa krigt n kuske, n ballon en slovve ogen.

k Geef aal verpleegkundegen n haand en hoop nait weer te kommen. Zai ook.

n Kwoaie dreum. k Doezel chemokoamer oet, trappen omdeel en hol mie beneden mit baaide handen aan t leven en muur vaast.

k Bin aan tonen tou mizzelk.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

6 + 6 =

Terug naar boven ↑
  • Literatuur activiteiten

    Geen nieuwe activiteiten