Column Nina Werkman, column

Gepubliceerd op 22 maart 2016 | door Webloug

0

‘Emospellen’ column van Nina Werkman

Emospellen

Op Dag van de Grunneger Toal was ik bie Hindry Schoonhoven zien lezen over ‘Grunnegers schrieven’. Dat was mazzel: k haar om dij tied al meer mist as mie noar d’zin was en omreden Hindry op zulfde tied aan de proat ging as Goffe Jensma, kwam doar nog Goffe zien ‘De toustand van de streektoal nou’ bie. Schaande. Dat Jensma mot ik ais n moal overdoun en din beter nait bie n sjekje boeten deur zunder dat je van mekoar waiten wèl of je veur joe hebben.

Bie Hindry ging t over spellen in t Grunnegers, mor wat e zee haar mainst zien komòf in proaten. Tot nou aan tou hait fonetiek din ook beheurlek laaidend veur spellen. Mor hou beheurlek is dat? Hou heurt t aiglieks? Haar k hier ook boven zetten kind. ‘Heuren’ is bie ons ja even zo goud t Nederlandse ‘behoren’, as t Nederlandse ‘klinken’. Mot t nog aans mit ons?
In ons landstoal lopt oetsproak van ploats tot ploats oet nkander, sums van nog dichterbie. Schrieven doun wie as t goud is apmoal volgens dezulfde regels en wie schikken ons doar toamelk gladjes in. Gekrakeel gait nait over fonetische weergoave van ‘kijken’ (‘kijk’n’, ‘kijke’ of ‘kaike’) mor over tussenletters n en s en olde c of nije k.

Over Abel Eppens (1534 – om en noabie 1590, Eekwerd, Oostfraisland en zo meer) las ik dat hai prezen wuir om zien Latijn mor dat e zien aigen toal noar t liekt net zo opschreef as hom t oetkwam. Wuir der in dij tied minder acht geven op spellen van t ‘Nederlands’ of kwam der in doagliekse toal niks op pepier wat dertou dee?
t Komt mie veur dat Eppens zien kroniek van zien gevuil oet schreef. Dat zel t weden: wie schrieven ons Grunnegers op gevuil. Wie bruken ‘emospellen’. En as regeliere spellen nait aanslut op dij ‘emo’, liggen wie dwaars. Om ‘zó zèggen wie dat nait!’, op de Leek, in t Smilke, in Slochter, Wildervank, Loppersom… As wie t nait ‘zó zèggen’, is t nait ons toal en toal doar wie in schrieven mot ons toal weden. Zo vuilen wie dat. t Grunneger ‘zulfde’ ligt zowat noadloos aan tegen t Grunneger ‘aigenste’ en ons aigenste ‘emospellen’ is ons laif.

En toch. Grunnegers schrieven blift mooi. Grunnegers lezen ook. En regels moaken dat nait zwoarder mor lichter. Toal gaait heur aigen roeme gaang deur t veen en wie volgen over ons smale looppadjes. Doar over (mit)proaten kin je nait genog. Schrieven net zo min.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

19 − 14 =

Terug naar boven ↑
  • Literatuur activiteiten

    Geen nieuwe activiteiten